Алматыда полиция қызметкерлері бұрын әлеуметтік желіде жол қозғалысы ережелерін ашық елемейтінін және өзіне «ештеңе болмайтынын» айтқан бейнеролик жариялаған әйелді анықтап, тоқтатты. Бұзушыға қатысты бірнеше факті бойынша әкімшілік іс қозғалды, деп хабарлайды infohub.kz сайты.
Алматы полиция департаментінің мәліметінше, кадрларда әйел қауіпсіздік белдігін тақпай көлік жүргізіп, белгіленген талаптарды әдейі сақтамаған. Алайда тексеру барысында бұл жалғыз бұзушылық емес екені анықталды: әйел бұған дейін сот шешімімен көлік жүргізу құқығынан айырылған болатын, соған қарамастан рөлге отырған.
Бейнежазбада әйел рөлде отырғанда белдікті ешқашан тақпағанын және бұдан былай да тақпайтынын, өйткені бұл «өзінің жеке ісі» екенін айтқан.
«Бұзушыға қатысты бірнеше факті бойынша әкімшілік іс қозғалды: жүргізуші куәлігінен айырылғаннан кейін көлік жүргізу, қауіпсіздік белдігін пайдалану ережелерін бұзу, сот шешімін орындамау және жалған ақпарат тарату. Материалдар сотқа жіберілді. Автомобиль арнайы айыппұл тұрағына қойылды», — деп хабарлады департаментте.
Сонымен қатар, жүргізушілік құқығынан айырылған адамға көлік басқаруды тапсырған автокөлік иесі де жауапкершілікке тартылды.
«Полицияның ұстанымы айқын: заң алдында бәрі тең. Ешқандай байланыс та, таныстық та, даурықпа мәлімдемелер де заңды бұзуға құқық бермейді. Әдейі менмендік пен жазасыз қаламын деген сенім жауапкершіліктен босатпайды. Заң мен тәртіп бәріне бірдей», — деп қосты құқық қорғау органдары.