Алматыда автобус пен мопед қатысқан жол апаты сотқа жетті. Тергеу барысында автобус иесі болып табылатын кәсіпорынның азаматтық жауапкершіліктен жалтарып кеткені анықталды. Оқиғаға Бас прокуратура араласты, деп хабарлайды infohub.kz.
NUR.KZ-нің қадағалау органына сілтеме жасап хабарлауынша, апат салдарынан әйел адам көз жұмған. Сот жүргізушілерді — И. және К. азаматтарын — кінәлі деп танып, оларға жәбірленушіге 25 млн теңге моральдық зиянды бірлесіп төлеу міндетін жүктеді.
Алайда істі зерделеу кезінде прокуратурада сұрақ туындады: қауіптілігі жоғары көзден келтірілген зиян неге тек жүргізушілерден ғана өндірілді, ал автобус иесі — серіктестік — азаматтық жауапкер ретінде танылмады?
«Заң бойынша кәсіпорын қауіптілігі жоғары көзден, яғни өз қызметкерлерінің әрекетінен келтірілген зиян үшін бірлесіп жауап беруге міндетті», — деді қадағалау органында.
Нәтижесінде Бас прокуратураның наразылығы бойынша кассациялық сот азаматтық талап бөлігіндегі сот актілерін жойып, істі жаңадан қарауға — сотталғандар мен заңды тұлғаның материалдық жауапкершілігінің мөлшерін анықтауға жіберді.