Almaty Air Initiative қоры Алматыда ластанған ауаның адам ағзасына қалай енетінін көрсету үшін эксперимент өткізді. Қаланы кезіп серуендеген соң микроскоптан не көрінгенін Kursiv LifeStyle жазып, infohub.kz сайты хабарлады.
Зерттеуге бес ерікті қатысты. Олар таңертең зертханаға келіп, әрқайсысынан алғашқы қан үлгісі алынды. Содан кейін қатысушылар Сатпаев — Жароков — Абай — Розыбакиев аралығындағы көшелермен серуендеуге шықты.
Екі ерікті KN95 қорғаныш респираторларымен жүрді, қалғандары маскасыз болды. Серуен барысында датчик PM2,5 бөлшектерінің концентрациясын 10–15 мкг/м³ деңгейінде тіркеді.
Қайтып келген соң қатысушылардан қайта қан алынып, ол жарық микроскопымен зерттелді. Серуенге дейін үлгілерде айқын бөгде элементтер табылмаған. Серуеннен кейін респираторсыз қатысушылардың жекелеген эритроциттерінде қара дақтар пайда болды.
Қор жетекшісі Жұлдыз Сәулебекованың айтуынша, ауаның ластануы сыртта ғана қалмайды. Ұсақ бөлшектер қан ағымына еніп, онымен бүкіл ағзаға тарала алады.
«Queen Mary University of London зерттеуі мен Almaty Air Initiative эксперименті растайды — адам көлік қозғалысы қарқынды жолдың жанында болған соң қанында пайда болатын көміртегі мен металл бар бөлшектердің ықтималдығы жоғары. Олар пайдаланылған газдарға, тежегіш пен шинаның тозуына тән», — деп жазады Almaty Air Initiative.
Бұған дейін Kursiv LifeStyle Алматы ауасының жай-күйі мемлекеттік органдардың нұсқасы бойынша басқа өлшемдерден қаншалықты өзгеше екенін жазған. Кейбір жағдайда көрсеткіштер арасындағы айырма 27 есеге жетеді.