Алматының Жетісу ауданында Есентай өзені бойымен Черновицкая көшесінен Самырсынға дейінгі аралықта жағалау құрылысы басталды. Жаңа демалыс аймағының ұзындығы 1200 метрді құрайды, деп хабарлайды infohub.kz.
Қалалық әкімдіктің мәліметінше, жоба аясында өзен арнасын тазарту және серуен аймағын жасау жоспарланған. Қоғамдық кеңістік аумағына 3700 шаршы метр брусчатка төселіп, 230 шаршы метр автотұрақ жасалып, 6850 шаршы метр көгалдандыру жұмыстары жүргізіледі. Сондай-ақ ұзындығы 1,2 шақырым болатын 120 жарық тіреуі, 50 орындық пен қоқыс жәшігі және екі ыңғайлы дәретхана орнатылады.
Демалыс аймағын құруға ерекше көңіл бөлінген: мұнда балалар мен спорт алаңдары, скейт алаңы және жаяу жүргіншілер жолдары пайда болады. Балаларға арналған әткеншек, сырғанақ және өрмелеу құрылғылары моторика мен дене белсенділігін дамытуға ықпал етеді.
Көпір өткелдерін қайта жаңарту жаяу жүргіншілер мен велосипедшілер үшін қауіпсіздік пен қолжетімділікті қамтамасыз етеді: тротуарлар мен веложолдар салынып, автоматты суару жүйесі орнатылады.
«Жаңа қоғамдық кеңістік өзен жағалауын қала ішіндегі бірегей табиғи саябаққа айналдырады. Құрылыс жұмыстары 2024 жылдың екінші тоқсанының соңына дейін аяқталады», — деді қалалық әкімдікте.
Бұған дейін Алматы әкімі Ерболат Досаев Есентай өзенінде жағалау салу туралы айтып, жұмыстарды маусым айының соңына дейін аяқтауды тапсырған болатын. Сондай-ақ, Наурызбай ауданында ұзындығы 7,7 шақырым болатын Қарғалы өзенінің жағалауын қайта жаңарту басталды.