Алматыда Гагарин даңғылының аллеясында, Абай даңғылымен қиылысқан жерден жоғары, иттерді серуендетуге тыйым салатын тақтайша пайда болып, әлеуметтік желілерде пікірталас тудырды, деп хабарлайды infohub.kz сайты.

Threads желісіндегі fabe_r деген пайдаланушы бұл белгінің орнатылуына түсініспеушілік білдірді. Оның айтуынша, тақтайшаларда мемлекеттік тіркеу нөмірі де, оларды орналастыруға жауапты ұйымның атауы да көрсетілмеген. «Алматы әкімдігі, оларды кім орнатты? Қандай негізде орнатылды? Бұл қандай өз бетінше әрекет?» — деп жазды ол, аллеяның үй жануарларын ұстаушылар арасында танымал екенін атап өтті.

Жарияланымға Алматының Бостандық ауданы әкімдігі жауап берді. Онда тақтайшалар аумақтың ластануын, газондар мен жасыл желектердің бүлінуін болдырмау, сондай-ақ аллеяға келушілердің барлығы үшін қолайлы жағдай сақтау мақсатында орналастырылғаны түсіндірілді.

Әкімдікте үй жануарларын ұстаушылар айналадағылардың қауіпсіздігін қамтамасыз етуге, өз питомецтерінің артынан уақтылы тазалауға және абаттандыру элементтерінің бүлінуіне жол бермеуге міндетті екені еске салынды. Бұл талаптарды әр серуен сайын сақтау қажет.

Аудан әкімшілігінің дерегінше, Гагарин даңғылының аллеясында иттерді серуендетуге арналған арнайы жабдықталған алаң бар. Оны мақсатына сай пайдаланып, жануарларды бақылауды және аумақтың тазалығын қамтамасыз ету сұралады. Еркін серуендету үшін арнайы бөлінген алаңдар мен аумақтарды пайдалану керек.

Сонымен қатар әкімдік нақтылағандай, тақтайшалар белгіленген учаскеден итті ауыздықпен және ұзындығы 1,5 метрден аспайтын қысқа қарғыбаумен, айналадағыларға қауіп төндірмей өткізуге мүмкіндікті жоққа шығармайды.