Алматылықтарға міндетті әлеуметтік медициналық сақтандыру аясында көрсетілген қызмет үшін қаланың медициналық ұйымдарына осы жылдың қазан айына дейін 130,3 млрд теңге төленді. Бұл — 211,8 млрд теңгелік жылдық бюджеттің 62%-ға жуығы, деп хабарлайды infohub.kz сайты.

Әлеуметтік медициналық сақтандыру қорының Алматы филиалының дерегінше, төлемнің басым бөлігі стационарлық емдеуге жұмсалды — 74,2 млрд теңгеден астам. Тағы шамамен 5,8 млрд теңге күндізгі стационар қызметін өтеуге бағытталды.

Басқа бағыттар бойынша да айтарлықтай қаржы игерілді: консультация мен диагностика — 22,2 млрд теңге, оңалту — 5,1 млрд теңге, жоғары технологиялық медициналық көмек — рекордтық 16,8 млрд теңге.

Қордың Алматы филиалының директоры Ілияс Мұхамеджан МӘМС жүйесінің арқасында қала тұрғындары жыл сайын қымбат тұратындарды қоса алғанда, хирургиялық араласудың түрлі түріне қол жеткізіп отырғанын атап өтті. Оның айтуынша, мұндай оталар күрделілігіне қарай емханаларда да, ғылыми орталықтарда да жасалады.

«Айта кетейік, қымбат оталар туралы айтсақ, сақтандырылмаған адамға олар бірнеше миллион теңгеге шығуы мүмкін және жарна мен аударым мөлшеріне тәуелді емес. Міне, МӘМС жүйесінің әлеуметтік бағыттылығы осы болса керек», — деді Ілияс Мұхамеджан.

Ең қымбат араласулардың үштігіне мыналар енді: имплантацияланатын қосалқы жүрек жүйесін орнату — 80,2 млн теңге (2025 жылы бір ота жасалса, 2026 жылдың 8 айында олардың саны 14-ке жетті); аллогенді гемопоэтикалық бағаналы жасушаларды трансплантациялау — 17,5 млн теңге; митральді клапанды клиптеу — 17,4 млн теңге (2025 жылы екі процедура, 2026 жылдың 8 айында 19).

Кардиохирургиялық оталарға 19,9 млрд теңге бағытталып, 7 367 араласу жасалды. Мұндай бір отаның орташа құны шамамен 3 млн теңгеге бағаланады.

Сонымен қатар қалада 5,6 млрд теңгеге 3 167 нейрохирургиялық ота, сондай-ақ жалпы құны 5,3 млрд теңге болатын жамбас және тізе буындарын алмастыру бойынша 3 368 ота жасалды. Тізімге 4,6 млрд теңгеге 3 558 тамырлық және нейротамырлық араласу мен 303,5 млн теңгеге бауыр, бүйрек және жүрек трансплантациясы бойынша 54 ота енді.