Алматы метрополитені 2025 жылдың қорытындысы бойынша таза шығын 6,96 млрд теңгені құрағанын infohub.kz сайты хабарлайды.
Кәсіпорынның қаржылық есептілігіне сәйкес, жыл ішінде түсім 23,2%-ға өсіп, 2024 жылғы 2,17 млрд теңгемен салыстырғанда 2,68 млрд теңгеге жетті. Алайда бұл қаражат шығындарды жабуға жеткіліксіз болды.
Қызмет көрсету құны өткен жылғы 19,94 млрд теңгеден 22,05 млрд теңгеге дейін өсті. Нәтижесінде жалпы шығын 19,38 млрд теңгені құрады, ал 2024 жылы бұл көрсеткіш 17,77 млрд теңге болған еді.
Қаржылық нәтижені жақсартуға 13,6 млрд теңге көлеміндегі өзге де кірістер көмектесті (2024 жылы — 11,68 млрд теңге). Осының арқасында операциялық шығын өткен жылғы 8,05 млрд теңгеден 6,96 млрд теңгеге дейін қысқарды.
Барлық кірістер мен шығындарды есептегенде, кәсіпорынның 2025 жылғы қорытынды шығыны 6,96 млрд теңгені құрады.
Метрополитеннің активтері жыл ішінде 8,8%-ға (24,3 млрд теңгеге) өсіп, 301,5 млрд теңгеге жетті. Міндеттемелер 49,7%-ға (1,5 млрд теңгеге) артып, 4,5 млрд теңгені құрады.
Бұған дейін алматылықтарға «Қалқаман» метро бекетінің дайын түрі көрсетілген еді.