Алматы облысында нарықтық құны 127 676 000 теңге болатын мүлік кешеніне қатысты азаматтық дау сот үкімінсіз шешілді — тараптар медиативтік келісімге келді, деп хабарлайды infohub.kz сайты.
Алматы облысы соттарының ресми Telegram-арнасында жазылғандай, Іле аудандық соты талап қоюшының жауапкерге мүлікті иелену тәртібі туралы арызы бойынша істі қарады.
Істі дайындау барысында сот қатысушыларға медиацияның артықшылықтарын және дауды келіссөздер мен өзара жеңілдіктер арқылы реттеу мүмкіндігін түсіндірді.
Сот талқылауын жалғастырудың орнына тараптар келіссөз жолын таңдап, екі жаққа да қолайлы шарттарды өздері айқындады. Нәтижесінде ымыраға келінді: мүлікті сатудың бастапқы бағасы 110 млн теңге, ең төменгісі — 80 млн теңге, ал бірлесіп сату мерзімі 9 ай деп белгіленді.
Әр тарап әлеуетті сатып алушыларды өз бетінше іздеуге және қажет болған жағдайда риелторлық агенттіктерді тартуға құқылы болды. Осылайша, дауға қатысушылар тек даулы мүліктің тағдырын келісіп қана қоймай, оны сату үдерісіне ықпал ету мүмкіндігін де сақтап қалды.
Медиативтік келісімді бекітуге байланысты талап қоюшыға 638 380 теңге мөлшеріндегі мемлекеттік баж қайтарылды.
Сот ұйғарымы заңды күшіне енді.