Алматы облысында жұмыс берушілер білікті мамандарға айына 1,25 млн теңгеге дейін төлеуге дайын. Аймақтағы мекемелердің бірінде заң бөлімінің басшысына ең жоғары жалақы ұсынылып отыр, деп хабарлайды infohub.kz сайты.
Бірқатар басшылық лауазымдар мен жоғары білікті кадрлар үшін табыс 1 млн теңгеге жетеді. Олардың қатарында — бас бухгалтер, бөлім басшысы, бас механик және жоба бойынша бас технолог.
Денсаулық сақтау саласында да жоғары жалақы ұсынылуда. Жалпы хирургия дәрігеріне 950 мың теңгеге дейін, ал бас дәрігерге немесе медициналық мекеме басшысына 877 мың теңгеге дейін төлеуге дайын.
Техникалық бейіндегі мамандар да сұранысқа ие. Бас инженерлерге, геодезистерге, тиеу машиналарының машинистеріне, комплектовщиктерге және қойма меңгерушілеріне 600-ден 700 мың теңгеге дейін ұсынылады.
Аймақтағы кадрларға жоғары сұраныс жаңа өндірістік нысандардың ашылуына және құрылыс, ауыл шаруашылығы, көлік және логистика салаларының дамуына байланысты.
«Аймақта білікті кадрларға жоғары сұраныс байқалады. Бұл жаңа өндірістік нысандардың ашылуына және құрылыс, ауыл шаруашылығы, көлік және логистика салаларының белсенді дамуына байланысты. Осыған орай еңбек нарығында мамандар тапшылығы сезіле бастады», — деп атап өтті әкімдікте.
Мамандардың дерегінше, алдағы жылдары Алматы облысына 26 мыңнан астам маман қажет болады. Биыл ең жоғары сұраныс құрылыс саласына тиесілі — мұнда 661 маман қажет. Ауыл шаруашылығында 557 жұмысшы, өнеркәсіп пен өндірісте 333, көлік пен логистикада 246, ал ТКШ және энергетика саласында 157 маман қажет.
Бұған дейін «Курсив» 50 жастан асқан 10 мыңға жуық жұмыссыз қазақстандықтың жыл басынан бері «Күміс жас» жобасы аясында жұмысқа орналасқанын жазған болатын. Жұмыс берушілерге егде жастағы қызметкерлерді жалдау тиімді болуы үшін мемлекет олардың жалақысының бір бөлігін өз мойнына алады.