Алматыда Сейфуллин даңғылында жол қозғалысын ұйымдастыру өзгеріп жатыр. Жұмыстар Әл-Фараби даңғылынан Сатпаев көшесіне дейінгі аралықты қамтиды. Бұл аралықта негізгі бұрылыстар сақталады, ал Forum сауда-ойын-сауық орталығының жанында жаңа бағдаршам орнату жоспарлануда, деп хабарлайды infohub.kz сайты.
Жол қозғалысын ұйымдастыру және жолаушылар көлігі басқармасының түсіндіруінше, өзгерістер қауіпсіздікті арттыруға және көлік ағындарын реттеуге бағытталған.
«Бұл аралықта негізгі бұрылыстар сақталады. Жүргізушілер бұрынғыша Forum сауда-ойын-сауық орталығының жанында, айналма шеңберде бұрылыс жасай алады, сондай-ақ Попов көшесіне бұрыла алады. Сонымен қатар, жаяу жүргіншілердің қауіпсіздігін арттыру үшін Forum сауда-ойын-сауық орталығының жанында жаңа бағдаршам нысанын орнату қарастырылған. Жұмыстарды ағымдағы жылдың соңына дейін аяқтау жоспарлануда. Барлық іс-шаралар аяқталғаннан кейін бұл аралықтағы қозғалыс жаңартылған схемаға сәйкес, барлық жол қозғалысына қатысушылардың қолайлылығы мен қауіпсіздігін ескере отырып ұйымдастырылатын болады», — делінген хабарламада.
Бұған дейін Алматыда үш қиылыста жекелеген оңға бұрылу түйіспелерінен бас тартылатыны хабарланған. Әкімдікте қозғалыстың қалай өзгеретінін және неге әдеттегі схеманы қайта қарауға шешім қабылданғанын түсіндірді.