Алматыда биылғы жылдың сәуірінде аялдама кешенінде әйелге шабуыл жасаған ер адамға үкім шығарылды. Сот оны бір жылға бас бостандығынан айырды, деп хабарлайды infohub.kz сайты.
Сот кабинетінде жарияланған іс материалдарына сәйкес, Т. деп белгіленген айыпталушы жәбірленушінің басына, бетіне және денесіне бірнеше рет соққы берген.
«Т. 2026 жылғы 23 сәуірде сағат 06.10 шамасында Қарғалы шағын ауданындағы Санаторная көшесінде орналасқан аялдама кешенінде бұзақылық ниетпен, Г.-ның шабуыл күтпейтінін және белсенді қарсылық көрсете алмайтынын пайдаланып, оған екі қолының жұдырығымен басы мен бетіне 5-6 рет соққы берді. Сондай-ақ аяғымен денесі мен басына 2-3 рет тепті, осылайша бұзақылық ниетпен оған жеңіл денсаулық зиянын келтірді», — делінген үкімнің сипаттама бөлігінде.
Сот отырысы барысында айыпталушы кінәсін толық мойындап, өкінді. Сот оны кінәлі деп танып, бір жылға бас бостандығынан айыру жазасын тағайындады. Жазасын ең жоғары қауіпсіздіктегі қылмыстық-атқару жүйесі мекемесінде өтейді.
Сонымен қатар сот жәбірленушінің талап-арызын қанағаттандырды. Нәтижесінде сотталған адам оған материалдық және моральдық зиянды, сондай-ақ сотта өкілдік ету шығындарын өтеу ретінде 1,5 млн теңгеден астам төлеуге міндеттелді.
Еске салайық, 23 сәуірде Алматының бір аялдамасында 68 жастағы әйелге ер адам шабуыл жасағаны белгілі болды. Ол әйелге бірнеше рет соққы берген. Полиция қылмысты ізін суытпай ашқанын мәлімдеді. Күдікті ұсталып, уақытша ұстау изоляторына қамалды.
Сондай-ақ әйелге медициналық көмек көрсетіліп, миына компьютерлік томография жасалғаны хабарланды. Тексеру нәтижесінде ми қан айналымының жедел бұзылуы мен мидың соғылу белгілері анықталмады.
Бұған қоса, шабуылдаушының бұрын сотталғаны белгілі болды: ол үйіне келген ер адамдардың біріне пышақ салып, екіншісіне ауыр денсаулық зиянын келтірген. Сот Т.-ны қорғанды деп шешіп, оған 2 жылға бас бостандығынан айыру жазасын тағайындаған.