Алматының Алмалы аудандық сотында «ҚазТрансГаз» ұлттық компаниясы» АҚ басқарма төрағасының бұрынғы кеңесшісі әрі қоғам белсендісі Санжар Бокаевтың ісі бойынша сот процесі басталды. Алғашқы отырыстардың өзінде судья Жанат Әбенова залдағы тәртіп ережелері мен сот шешіміне ықпал ету әрекеттері үшін жауапкершілік туралы қатысушылардың бәріне қатаң ескертті, деп хабарлайды infohub.kz сайты.
БАҚ өкілдері мен жұртшылық үшін бөлек залда тікелей трансляция ұйымдастырылды. Судья бұған қоса, кез келген басқа түсірілім жасауға немесе процесті телефоннан таратуға қатаң тыйым салынғанын айрықша атап өтті.
Әбенова сондай-ақ бұқаралық ақпарат құралдарындағы немесе әлеуметтік желілердегі істің мәніне қатысты кез келген жария баға мен пікірлерді сот әділдікке тікелей қысым ретінде қарайтынын мәлімдеді.
Журналистер мен блогерлерді арандатушылық әрекеттерді таратпауға және қоғамда алдын ала пікір қалыптастырмау үшін баға беруден бас тартуға шақырды.
Тәртіпті бұзғандар мен өкімдерге бағынбағандар залдан дереу шығарылып, сотқа құрметсіздік үшін жазаға тартылады.
Еске салайық, бұрынғы топ-менеджер әрі қоғам белсендісі Санжар Бокаев бірден бірнеше бап бойынша — алаяқтық, ұрлық, ақшаны жылыстату, заңсыз ағаш кесу және көрінеу жалған ақпарат тарату (Қазақстан Республикасы Қылмыстық кодексінің 190, 188, 218, 340 және 274-баптары) бойынша күдікті.
Тергеу сондай-ақ Бокаевтың табысы төмен адамдарды тартып, құқыққа қарсы әрекеттерді ұйымдастырып, қаржыландырған болуы мүмкін деп санайды. Құқық қорғау органдарының нұсқасы бойынша, оларға ақы үшін ағаш кесу мен ұрлық жасау тапсырылған.