Алматы прокуратурасы сот арқылы қала орталығында орналасқан бұрынғы теміржол ауруханасының жері мен ғимаратын мемлекет меншігіне қайтарды. Шығарылған активтердің жалпы құны 2 млрд теңгеден асады, деп хабарлайды infohub.kz.
Нысан мен оған іргелес жерлер бұрын Теміржол апаттар медицинасы госпиталіне тиесілі болған. 2018 жылы бірқатар мәмілелер нәтижесінде мүлік бәсекелес ортадан тыс жеке меншікке шығарылған. Сотта Алмалы ауданының прокурорлары жер мен жылжымайтын мүлікті сату Қазақстанның жер және мүлік заңнамасын айналып өткенін, ал мәмілелер тізбегіне қатысушылардың өзара байланысты тұлғалар екенін дәлелдеді.
Бұған дейін қала прокуратурасы атқарушылық іс жүргізу бойынша сауда-саттықты жойып, нысанның үшінші тұлғаларға қайта сатылуына жол бермеген. Сот мемлекеттік мүлікті иеліктен шығару бойынша барлық мәмілелерді жарамсыз деп таныды. Нәтижесінде мемлекетке: ауданы 1628 шаршы метр ғимарат, жалпы ауданы 0,3 га екі жер телімі қайтарылды. Мүліктің жалпы бағасы — 2 млрд теңгеден астам. Апелляциялық алқа шешімді өзгеріссіз қалдырды.
Бұрынғы теміржол ауруханасының ғимараты өзінің колонналары, аркалары, сәулеттік әшекейлері мен ұлттық ою-өрнектері бар сәулетімен алматылықтардың назарын аударған. Ол 1948–1950 жылдары сәулетші Кудрявцевтің жобасы бойынша салынған және бастапқыда Түрксіб ауруханасы деп аталған. 2024 жылы Абай даңғылы мен Масанчи көшесінің қиылысында орналасқан ғимаратта өрт болды: екінші қабатта қоқыс жанып кеткен. Өрт тез сөндірілді, бірақ іздері қалды.