Алматы-1 теміржол вокзалында ауыр зардаптарға әкелуі мүмкін оқиға болды. Мас күйіндегі үш ер адам жүріп бара жатқан пойыздың баспалдағына секірмек болып, машинист кабинасына бөгде заттар лақтырған. Салдарынан машинист авариялық тежегіш қолдануға мәжбүр болды, деп хабарлайды infohub.kz.
ҚР ІІМ Көліктегі полиция департаментіндегілердің айтуынша, оқиға Алматы-1 станциясында болған. Құқық қорғау органдары теміржол көлігінде жүріс-тұрыс ережесін өрескел бұзып, пойыз қозғалысына нақты қауіп төндірген үш азаматты ұстады.
Бұзушылардың жеке басы анықталды — олар Жамбыл және Алматы облыстарының 32 бен 35 жас аралығындағы тұрғындары болып шықты. Алматы — Атырау бағытындағы жолаушылар пойызы жөнелген сәтте олар локомотивтің баспалдағына секірмек болып, тұтқадан ұстаған. Бұл кезде олар машинист кабинасына бөгде заттар лақтыра бастаған.
Адамдардың қауіпсіздігіне төнген қауіпке байланысты машинист авариялық тежегіш қолданған. Пойыздың жоспардан тыс тоқтауы екі минутқа созылды.
Ұсталғандарға қатысты әкімшілік іс қозғалды. Негіз ретінде қоғамдық орындарда алкогольдік ішімдік ішу немесе мас күйінде жүру, сондай-ақ теміржол көлігі нысандарында жүріс-тұрыс ережесін бұзу алынды.