Алматының Әуезов ауданында Қала күніне орай ауданы 400 шаршы метр жаңа жастар комьюнити-орталығы ашылды. Мұнда дыбыс жазу студиясы, би залы, робототехника мен 3D-модельдеу аймақтары, цифрлық контент жасау кеңістігі, сондай-ақ білім беру және кеңес беру алаңдары жабдықталған. Орталықтың барлық мүмкіндігі жастарға тегін қолжетімді, деп хабарлайды infohub.kz сайты.
Жаңа кеңістікпен Алматы әкімінің орынбасары Абзал Нүкенов танысты. Нысанның ашылуы Алматы әкімі Дархан Сатыбалдының қолдауымен жастар орталықтары желісінің дамуын жалғастырды. Қазіргі таңда қаланың барлық ауданында осындай 12 алаң жұмыс істеп тұр.
«Жастар орталығы тек іс-шара өтетін орын емес, жас адам білім алып, дамып, өз идеясын жүзеге асыра алатын кеңістік болуы маңызды», — деді Абзал Нүкенов.
Жаңа орталықтың бір бағыты — «AI Креатор» курсы. Мұнда жастарға контент жасауда жасанды интеллектіні пайдалануды үйретеді: идея мен сценарийден бастап визуал, дыбыс және монтажға дейін. Бірінші легіне 20-ға жуық адам тіркелді.
Дыбыс жазу студиясында ән мен подкаст жазуға, би залында воркшоп өткізуге, контент аймағында фото мен видео түсіруге болады. Робототехника мен 3D-модельдеу аймағында ашылуға орай Алматының символдарының бірі — алмасы бар «Тілек ағашы» жасалды.
Ашылу күні ALMATY 24 sagat бейнебайқауы да басталды. 24 сағат ішінде қатысушылар қала, өз ауданы, сүйікті жерлері мен адамдары туралы қысқа бейне түсіруі керек.
«Әрбір жас адамның өз бағытын табуына — жаңа дағды игеруіне, технологияда, шығармашылықта өзін сынап көруіне немесе жеке жобасын бастауына мүмкіндік болғанын қалаймыз», — деп түсіндірді Алматы жастар саясаты басқармасының басшысы Азиз Кажденбек.
Жыл басынан бері 10,6 мыңнан астам жас алматылық комьюнити-орталықтардан жұмысқа орналасу мен кәсіптік бағдар бойынша көмек, сондай-ақ психологиялық және құқықтық кеңес алды. «Заң және тәртіп» бағыты аясында мұнда 18 мыңнан астам адам қатысқан 190-ға жуық іс-шара өтті, ал «Таза Қазақстан» аясындағы 80-нен астам экологиялық акция 10 мыңнан астам жас қала тұрғынын біріктірді.