InfoHub Logo

Алматыда интернет-жарнама саласындағы ірі тұлға, "Webcom Kazakhstan" ЖШС-нің бұрынғы басшысы Евгений Горожанкинге қатысты сот үкімі жарияланды. Ол компанияның 473 миллион теңгеден астам қаражатын заңсыз иемденіп, оны өзіне қарасты компанияларға аударды деген айыппен 8 жылға бас бостандығынан айырылды.

Бұл туралы Infohub.kz ақпарат агенттігі хабарлайды.

Тергеу нұсқасы бойынша, 2022 жылы компания серіктестері арасында корпоративтік жанжал туындаған. Осыдан кейін, "Webcom Kazakhstan"-ды басқарған Горожанкин компанияның ақшасын өзіне қатысты заңды тұлғалардың есепшоттарына аударуды тапсырған. Сонымен қатар, тиімді клиенттердің бір бөлігін де сол компанияларға берген.

Компания банкроттыққа ұшырау алдында қалды

Салдарынан, тергеу анықтағандай, "Webcom Kazakhstan" банкроттыққа ұшырау алдында қалған. Компанияның шетелдік үлестес серіктестері құқық қорғау органдарына шағымданған.

Тергеу барысында компаниядан қаржы шығарылғаны және басқа да заңсыз әрекеттер жасалғаны анықталды. Іс материалдарында басшының жеке жалақысын 2 мың доллардан 5 мың долларға дейін көтергені және өзіне қайтарымсыз несиелер бергені туралы да айтылған.

Басшы мен оның қызметкері сот алдында

Өткен жылдың көктемінде Евгений Горожанкин қамауға алынды. Кейін оның қызметкері Евгения Корнюшко да қамауға алынып, екеуіне де ұрлық жасады деген айып тағылды.

Сотта Горожанкин 39 миллион теңге көлеміндегі өзімбілемдік әрекетті мойындады. Қалған қаржыны клиенттердің мұқтаждығына жұмсалды деп мәлімдеді. Евгения Корнюшко да осыған ұқсас пікірде болды.

Алайда, сот компанияның ақшасын басқа компаниялардың есепшоттарына аударуды аса ірі көлемдегі ұрлық деп таныды.

Үкім

Қорытындылай келе, Евгений Горожанкин 8 жылға, ал Евгения Корнюшко 7 жылға бас бостандығынан айырылды. Корнюшконың жазасы шартты түрде белгіленді.