Алматы тұрғыны адал емес мердігерден ірі соманы сот арқылы өндіріп алды. Мердігер ақшаны алғанымен, жұмысты ақаулы орындап, аяқтамаған. Іс Жамбыл облысының Мойынқұм аудандық сотында қаралды. Пәтер иесі жеке кәсіпкерге қарсы талап арызбен жүгінген. Нәтижесінде келісімшарт бұзылып, жауапкерден миллиондаған теңге өндірілді... деп хабарлайды infohub.kz.
2025 жылдың қазан айында тапсырыс беруші мен мердігер арасында Алматыдағы пәтерде жөндеу жұмыстарын жүргізу туралы келісімшарт жасалды. Жобаның жалпы құны 6,2 миллион теңгені құрады. Тапсырыс беруші жұмыстың алғашқы үш кезеңі үшін мердігерге 4,7 миллион теңге төледі, алайда жөндеу жұмыстары созылып, аяқталмай қалды. Орындалған жұмыстар мен пайдаланылған материалдардың сапасы келісімшарт талаптарына сәйкес келмеді.
Жеке кәсіпкер ақаулы жұмысты жою туралы бірнеше рет айтылған талаптарды елемеді. Соңында пәтер иесі жөндеушілердің пәтерге кіруіне тыйым салып, келісімшартты бұзу және ақшаны қайтару туралы талаппен сотқа жүгінді.
Сотта жауапкер талапты мойындамай, жөндеудің бір бөлігі орындалғанын, ал тапсырыс берушінің үй-жайға кіруге рұқсат бермеуіне байланысты жұмысты аяқтай алмағанын мәлімдеді. Алайда сот тағайындаған сараптама нақты орындалған жұмыстар мен пайдаланылған материалдардың құны 1,4 миллион теңгені құрайтынын көрсетті. Сонымен қатар, сарапшылар пәтердің барлық бөлмелеріндегі бүлінген плитканы демонтаждау және толық ауыстыру құнын 760 мың теңгеге бағалады.
Сот жеке кәсіпкердің келісімшарт талаптарын елеулі түрде бұзғанын, осыған байланысты тапсырыс беруші төлем кезінде күткен нәтижеге қол жеткізе алмағанын анықтады. Сот шешімімен құрылыс мердігерлік келісімшарты ресми түрде бұзылып, жауапкерден талап қоюшының пайдасына 3,9 миллион теңге негізгі сома, сондай-ақ нотариаттық, өкілдік шығындар мен сараптама жүргізуге 385 мың теңге өндірілді.
Қазіргі уақытта сот шешімі заңды күшіне енбеген және оған шағым жасалуы мүмкін.