Алматылық тұрғын пәтер, тұрғын емес үй-жай және тұрақ орнын толық төлеп, нысанның тапсырылу мерзімі бұзылғаны үшін сот арқылы мердігерден 10 млн теңгеден астам қаражат өндіріп алды. Бұл туралы infohub.kz сайты хабарлайды.

Жоғарғы соттың Telegram-арнасында мәлім еткендей, 2021 жылы алматылық мердігермен пәтер, тұрғын емес үй-жай және тұрақ орнын сатып алуға алдын ала шарттар жасасқан. Ол нысандардың құнын толық төлеген.

«Мердігер құрылыс жұмыстарын аяқтап, негізгі сатып алу-сату шарттарын 2023 жылдың соңына дейін жасасуға міндеттенген. Алайда іс жүзінде нысан тек 2024 жылдың қазанында пайдалануға берілді. Қабылдау-тапсыру актілері 2025 жылдың қаңтарында қол қойылып, негізгі сатып алу-сату шарттары 2025 жылдың наурызында жасалды», — деді сотта.

Осыған байланысты сатып алушы сотқа жүгініп, мердігердің нысанды пайдалануға беру және негізгі шарттарды жасасу мерзімдерін бұзғанын көрсетіп, міндеттемелерді орындау мерзімі бұзылғаны үшін өсімпұл өндіруді талап етті.

Айта кетейік, бірінші және апелляциялық сатылардағы соттар Азаматтық кодекстің 353-бабы бұл дауға қолданылмайды деп, талап қоюды қанағаттандырудан бас тартқан. Себебі бастапқы міндеттеме ақшалай болмаған, ал негізгі шарттар жасалғаннан кейін алдын ала шарттар бойынша міндеттемелер тоқтатылады.

«Азаматтық істер жөніндегі кассациялық сот бұл тәсілмен келіспеді. Сот негізгі шарттың жасалуы оның жасалуына дейін жіберілген шарттарды бұзғаны үшін жауапкершіліктен босатпайтынын атап өтті. Сатып алушы төлем бойынша өз міндеттемелерін толық және уақтылы орындаған, ал мердігер нысандарды пайдалануға беру және негізгі шарттарды жасасу мерзімдерін бұзған», — деп қосты Жоғарғы сотта.

Шарттарда мердігердің жауапкершілігі қарастырылғаны нақтыланды: мерзімі кешіктірілген әрбір күн үшін сатушы жылжымайтын мүлік құнының 0,1%-ы мөлшерінде өсімпұл есептейді, бірақ 10%-дан аспайды.

Кассациялық сот өсімпұл міндеттемені тиісінше орындамағаны үшін, соның ішінде мерзімдерді бұзғаны үшін жауапкершілік нысаны екенін түсіндірді. Бастапқы міндеттеменің ақшалай сипатта болмауы сатып алушыны өсімпұл алу құқығынан айырмайды.

Нәтижесінде бірінші және апелляциялық сатылардағы сот актілері жойылып, 10,5 млн теңге өсімпұл өндіру туралы жаңа шешім шығарылды.