Алты жасар қытай қызы Рубик кубигін 4 секундтан сәл астам уақытта жинап, әйелдер арасындағы жаңа әлемдік рекорд орнатты. Бұл туралы мемлекеттік бұқаралық ақпарат құралдары хабарлады, деп жазады infohub.kz сайты.
«Спидкубер» Лянь Юньчжи осы айда Ухань мен Гуанчжоуда өткен Рубик кубигі қауымдастығы сертификаттаған екі жарыста 3x3 бойынша әйелдер арасындағы орташа әлемдік рекордты екі рет жаңартты. Бұл жөнінде мемлекеттік «CCTV» телеарнасы дүйсенбі күні мәлімдеді.
Ол Рубик кубигін бес рет жинаған соң 4,52 және 4,27 секунд орташа нәтиже көрсетті.
Чэнду қаласынан шыққан қыз «4,5 секундтан төмен орташа нәтиже көрсеткен тұңғыш әйел спидкубер» атанды, деп хабарлады «CCTV».
Телеарна жариялаған бейнежазбада ол басына қызыл түсті торлы бантик таққан күйі Рубик кубигін ептілікпен бұрып, ширатып жатқаны көрінеді.
Кубикті жинап болған соң ол ойыншықты үстелге қойып, қолын шапалақтап, жұдырығын жоғары көтерген.
«Чжичжи» деген лақап аты бар алты жасар қыз Рубик кубигімен би және музыка сабақтары сияқты түрлі сыныптан тыс үйірмелермен қатар арнайы курсқа жазылған соң танысқан. Бұл туралы оның анасы Линь Янси жергілікті бұқаралық ақпарат құралдарына айтты.
Линь кубик жинаудың «баланың жан-жақты қабілетін дамытуға таптырмас әрекет» екенін «бірте-бірте түсініп», назарын соған аударғанын Чэндудағы «Red Star News» басылымына мәлімдеді.
Қызы қазір Рубик кубигін жинаудың 1300-ден астам алгоритмін меңгеріп, күн сайын екі-үш сағат жаттығады, деді Линь.
«Red Star News» жариялаған суреттерде қыздың жүлделері үйіндегі сөреге қойылғаны көрінеді.
«Рубик кубигін жинау зейінді, жадыны, логикалық ойлауды, кеңістікті түйсінуді жақсартып, жеңіс пен жеңіліске деген салауатты көзқарас қалыптастыруға көмектеседі», — деді Линь.
«Бұл формулаларды соқыр жаттау емес, оңтайлы шешімді табу үшін логикалық пайымдауды қолдану», — деп қосты ол.