Ұлытау облысы прокуратурасы өз балаларына алимент төлемей, миллиондаған теңгені букмекерлік платформаларға жұмсаған ондаған борышкерді анықтады. Тексеру көрсеткендей, кейбіреулері ойын шоттарын үнемі толықтырып, ставка жасап, ұтыс алып отырған, бірақ балаларын асырауға қаражат аудармаған. Анықталған деректер бойынша сотқа дейінгі тергеулер басталды, деп хабарлайды infohub.kz.
«Кезекті тексеру барысында қадағалау органының қызметкерлері алимент бойынша берешегі бар 22 борышкерді анықтады. Олар алимент қарыздарына қарамастан, букмекерлік кеңселерде ставка жасауға елеулі қаражат жұмсауды жалғастырған», — деп мәлімдеді облыс прокуратурасы.
Қадағалау органының анықтауынша, бұл азаматтар ата-аналық міндеттерін орындамай, балаларына қарыз болған. Сонымен бірге олар ойын шоттарын үнемі толықтырып, ставкаларға қатысып, ақшалай ұтыстар алған.
Ең айшықты жағдайлардың бірі — алимент берешегі 3,9 млн теңгеге жеткен борышкер. Тексеру деректеріне сәйкес, ол 2020 жылдан бастап букмекерлік кеңседе тіркелген. Осы уақыт аралығында ол ойын шотын жалпы 4,6 млн теңгеге толықтырған. Сонымен қатар, ол кезеңде 3,1 млн теңге көлемінде ұтыс алған. Ал өз балаларын асырауға қаражат аудармаған.
Барлық анықталған деректер бойынша Қазақстан Республикасы Қылмыстық кодексінің балаларды асырауға арналған қаражатты төлеуден жалтару үшін жауапкершілік көзделген 139-бабымен сотқа дейінгі тергеулер басталды.
Ұлытау облысы прокуратурасы ата-аналардың балаларын асырау міндеті заңның тікелей талабы екенін және оны жеке мән-жайларға қарамастан елемеуге болмайтынын атап өтті. Ведомство сондай-ақ нақты табыстарды жасыру, алименттік міндеттемелерді орындаудан жалтару не балалардың мүддесіне зиян келтіріп қаражат жұмсау заңда көзделген жауапкершілікке әкеп соғуы мүмкін екенін ескертеді.
Прокуратура азаматтарды ата-аналық міндеттерін адал орындауға шақырады, өйткені балалардың құқықтары мен заңды мүдделерін қорғау қадағалау органдары жұмысының басым бағыттарының бірі болып қалады.