Сумен жабдықтау және кәріз жүйелеріне құбырлар салумен айналысатын «АП-Импэкс» компаниясы 2025 жылдың қорытындысы бойынша 350,5 млн теңге пайда тапты. Бір жыл бұрын компания 380,8 млн теңге шығынға ұшыраған еді. Кәсіпорынның тең иелерінің бірі — 45 жастағы Жаслан Карипов. Ол 11 жылдан астам уақыт бойы республикалық джиу-джитсу және аралас жекпе-жек федерациясының Оңтүстік Қазақстан, қазіргі Түркістан облысы бойынша филиалын басқарған, деп хабарлайды infohub.kz сайты.
Заңды тұрғыдан компания Астанада тіркелген. Оның қызмет аясы сумен жабдықтау және кәріз жүйелеріне құбырлар салуды, сондай-ақ құрылыс, жөндеу-құрылыс және құрылыс-монтаж жұмыстарын қамтиды.
«АП-Импэкс» жарғылық капиталы тең бөлінген: 50%-ы 51 жастағы Махаббат Искаковаға, 50%-ы 45 жастағы Жаслан Кариповқа тиесілі. Махаббат Искакованың бұған қоса жеке кәсіпкерлігі және Көкшетаудағы «Кокше Экотара» компаниясындағы үлесі бар. Ол үлесті Балтабай Кадиржановпен бірге иеленеді.
Жаслан Карипов болса, QR Holding Ltd. жеке компаниясына иелік етеді, сондай-ақ Жанат Акмагамбетовпен бірге Астанадағы «Акмолатранстехмонтаж» компаниясындағы үлесі бар. Ашық дереккөздерге сәйкес, ол 2013 жылдан бастап 11 жылдан астам уақыт бойы республикалық джиу-джитсу және аралас жекпе-жек федерациясының Оңтүстік Қазақстан облысы бойынша филиалын басқарған. Бүгінде бұл облыс Түркістан деп аталады.
«АП-Импэкс» үнемі қожайындарға бөлінбеген пайдадан немесе өткен кезеңдердегі кірістерден дивиденд жіберіп отырады. 2024 жылы меншік иелеріне 978,2 млн теңге дивиденд төленсе, 2025 жылы 363,8 млн теңге төленді.
Ашық дереккөздердегі мәліметтерге сәйкес, компания коммуналдық инфрақұрылым саласында бірқатар жобаны жүзеге асырды. Астанада ол су құбырларын салумен және қайта жаңартумен айналысты. Оның ішінде бірінші көтерілім сорғы станциясынан ауыз су станциясына, яғни сорғы-сүзгі станциясына дейінгі беруші су құбырын қайта жаңарту жұмыстары бар.
Сонымен қатар «АП-Импэкс» Қостанай облысындағы Лисаковск қаласында жылу желілерін қайта жаңартуға және Қарағанды облысындағы Теміртау қаласында жылу магистралін күрделі жөндеуге қатысты. Павлодарда компания коллекторды қайта жаңарту жұмыстарын жүргізсе, Қарағандыда жаңбыр суы кәрізін салумен айналысты. Оның портфелінде коммуналдық инфрақұрылым саласындағы басқа да жобалар бар.
Алайда 2025 жылы компанияның түсімі 2024 жылғы 23,1 млрд теңгеден 8,9 млрд теңгеге құлдырады. «АП-Импэкс» компаниясының 2025 жылдың соңындағы бөлінбеген пайдасы 7,05 млрд теңгені құрады.