Америка Құрама Штаттарында ауқымды авиациялық коллапс болды: бүкіл ел бойынша уақытша ұшуға тыйым салынуы 11 мың рейске әсер етті. Төтенше шектеулер жергілікті уақытпен 13 қарашада 15:53-те (Астана уақытымен 14 қарашада 01:53-те) күшіне енді, деп хабарлайды infohub.kz сайты.
Елдегі барлық әуежайдан ұшуды жалпыұлттық тоқтату туралы Азаматтық авиация жөніндегі федералдық басқарма (FAA) жариялады. Ведомствоның шұғыл хабарламасында: «Төтенше жағдайларға және қауіпсіздік мақсатында (…) федералдық авиация командалық орталығының өкімімен барлық әуежайда ұшуға тыйым салынды. Барлық ұшатын трафик кейінгі хабарламаға дейін жерде қалуы тиіс. Келіп жатқан халықаралық рейстер жеке тәртіппен қызмет көрсетіледі», — делінген.
Коллапстың себебін көлік министрі Шон Даффи Ақ үйдегі баспасөз конференциясында айтты. «15:36-да біз бүкіл ел бойынша коммуникациялық және радиолокациялық орталықтарымыз бен мұнараларымызда тұрақсыздықты тіркедік», — деді ол. Шенеуніктің айтуынша, радарлардан дәйексіз ақпарат келе бастаған, алайда байланыс та, радиолокациялық мүмкіндіктер де толық жоғалмаған. «Біздің әуе көлігін бақылау жүйелеріміз өте ескі», — деп шағымданды министр.
Cirium авиациялық талдау компаниясының баспасөз қызметі коллапс 11 мың рейске және 1,5 млн жолаушыға әсер еткенін хабарлады. Сонымен қатар төрт мыңнан астам ұшу тоқтатылды. Шектеулер төрт сағаттан астам уақытқа — 20:19-ға дейін (Астана уақытымен 14 қарашада 06:19-ға дейін) созылды.
Бұл — 2001 жылғы 11 қыркүйектегі террористік шабуылдан бергі АҚШ тарихындағы екінші осындай оқиға екені атап өтіледі. Өткен жолы FAA ішкі рейстерге тыйымды 2023 жылдың қаңтарында енгізген, бірақ шектеулер екі сағаттан азға созылған.