Америка Құрама Штаттары Иранға жаңа ұсыныс жасады: Вашингтон Тегеранды ядролық отынмен қамтамасыз етуге дайын, бірақ ол үшін Иран өзінің уран байыту бағдарламасынан бас тартуы тиіс. Бұл туралы Bloomberg агенттігіне берген сұхбатында АҚШ энергетика министрі Крис Райт айтты, деп хабарлайды infohub.kz сайты.
«Біз (Иранға — ред. еск.) (ядролық — ред. еск.) отынды шетелден жеткізе аламыз. Олар қайтадан ұлттар қауымдастығына қосылып, халқына бейбітшілік пен өркендеу әкеле алар еді», — деді Райт.
Оның айтуынша, Америка Құрама Штаттары өзінің уран жеткізу тізбегін құруды іс жүзінде аяқтаған. Энергетика министрі өз ведомствосы уран өндіру және серіктестік қарым-қатынас саласындағы ұзақ мерзімді келісімдерді дайындауды аяқтап жатқанын атап өтті.
«Біз келіссөз жүргізуді қалаймыз. Әйтпесе олар өздерінің жасырын, құпия, жабық ядролық қару жасау бағдарламасын жалғастырып, америкалық әскерилерге қарсы тұра алады. Бұл олардың ядролық қару жасамайтынына кепілдік береді», — деп қосты Райт.
Сонымен қатар АҚШ Энергетика министрлігінің басшысы мұнай нарығының қатысушыларын Ормуз бұғазындағы ахуалға қатысты шамадан тыс оптимизмнен сақтандырды. Оның айтуынша, жақын арада Иранмен қарым-қатынаста дипломатиялық серпіліс күтуге болмайды. Қазіргі таңда бұғаз арқылы тәулігіне шамамен 10 млн баррель мұнай мен мұнай өнімдері өтеді, бұл баламалы құбырларды ескергенде дағдарысқа дейінгі көлемнің үштен екісін ғана құрайды. Министр әлемдік энергия тасымалдаушылар нарығының қазіргі жай-күйі аса тұрақсыз және күрделі болып қала беретінін атап өтті.
Еске салайық, бұған дейін Дональд Трамп Иранда ешқашан ядролық қару болмайтынын мәлімдеп, Ормуз бұғазы ашылмаса, жаңа соққылар жасалатынын ескерткен болатын.