Америка Құрама Штаттары мен Қытай Халық Республикасы тауарларға баж салығын өзара 30 миллиард долларға төмендетуге және жасанды интеллект жөнінде диалог бастауға келісті. Бұл шешімдер ҚХР төрағасы Си Цзиньпиннің Вашингтонға сапары аясында, оның ішінде АҚШ президенті Дональд Трамппен келіссөздер барысында қол жеткізілген сегіз тармақтың қатарына енді. Бұл туралы Қытай елшілігі хабарлады, деп жазады infohub.kz сайты.
Пекин мен Вашингтон сондай-ақ бірлескен сауда кеңесін дамытуға және Куала-Лумпурдегі келіссөздерде қол жеткізілген уағдаластықтардың мерзімін ұзартуға келісті. Екі елдің көшбасшылары өз командаларына келісілген шараларды жүзеге асыруды тапсырды. Алайда сапар қорытындыларының жарияланған тізімінде баж салығы қай тауарларға төмендетілетіні және өзгерістер қашан күшіне енетіні нақтыланбаған.
Жеке тармақ жасанды интеллект саласындағы ынтымақтастыққа арналды. Тараптар технологияның тәуекелдері мен артықшылықтарын талқылауды, сондай-ақ жасанды интеллектке қатысты оқиғалар туралы хабарлау үшін байланыс арнасын құруды жоспарлап отыр. Диалогтың келесі кезеңі қараша айына жоспарланған.
Сыртқы саясатта Си Цзиньпин мен АҚШ президенті Дональд Трамп Иран ядролық қару жасамау міндеттемесін ұстануы керек деген келісімге келді. Қытай тарапының хабарлауынша, көшбасшылар сондай-ақ халықаралық су жолдарынан өткені үшін ақы алуға қарсы шықты. Сонымен қатар елдер АТЭС және G20 саммиттерін өткізу кезінде бір-бірін қолдауға келісті.
Си Цзиньпиннің АҚШ-қа сапары 23–25 қыркүйек аралығында өтті.