Америка Құрама Штаттарының Жапониядағы әскери күштері сейсенбі күні Окинава аралының оңтүстігіндегі Кадена әуе базасында қытайлық BYD электр көлік өндірушісінің көліктеріне қауіпсіздік тұрғысынан тыйым салғанын мәлімдеді, деп хабарлайды infohub.kz сайты.
Осы аптада күшіне енген шектеу Вашингтонның құпия ақпарат жинауға пайдаланылуы мүмкін деп күдіктенетін қытай технологиясына қарсы күресі аясында басқа да американдық әскери нысандарда ұқсас шаралар қолданылуы мүмкін деген болжамға жол ашты.
«Бұл көліктер біздің қызметкерлер мен міндетіміз үшін қабылдауға болмайтын және алдын алу мүмкін емес қауіп төндіреді», — деді Каденадағы АҚШ әуе күштерінің 18-қанатының өкілі подполковник Элли Стормер.
Шектеулер жеке меншіктегі автокөліктер, таксилер мен жеткізу көліктерін қоса, барлық BYD көліктеріне қатысты. База қақпаларында тұрған күзетшілерге BYD көліктерін өткізбей, жүргізушілерді кері қайтару туралы нұсқау берілгені хабарланды.
Шығыс Азиядағы ең үлкен американдық әуе базасы саналатын Кадена Қытай, Ресей немесе Солтүстік Корея қатысатын дағдарысқа жауап беруге тікелей тартылады. Оның қару-жарағы қатарында 1 600 шақырымға дейін Tomahawk зымырандарын атуға қабілетті делінетін қуатты Typhon зымыран жүйесі бар. Базаның сайтына сәйкес, мұнда сондай-ақ истребительдер мен әуеде жанармай құюға, бақылау мен барлауға арналған ұшақтар орналасқан.
Бұл қадам камералар, сенсорлар мен GPS құрылғылары сияқты көлікке орнатылған технологиялар арқылы ақпараттың тарап кетуі мүмкіндігіне қатысты алаңдаушылық аясында жасалды, деп хабарлады Оңтүстік Кореяның Yonhap агенттігі.
Американдық әскери шенеуніктер нақты қауіпті атаған жоқ. Алайда тыйым АҚШ пен басқа да батыс елдерінің иелерін «тыңдауға» пайдаланылуы мүмкін деп қорқатын қытайлық смарт технологияны көліктерде, ұялы телефондарда және басқа құрылғыларда шектеу жөніндегі кеңірек шараларының бір бөлігі.
Маусымда Пентагон BYD-ді елдің әскери құрылымымен байланысы бар деп есептейтін 188 қытайлық компанияның тізіміне қосты, бұл Бейжіңнің наразылығын тудырды. Қара тізімде сондай-ақ Nio автоконцерні, Alibaba электрондық сауда компаниясы мен Baidu интернет компаниясы бар.
АҚШ Қорғаныс министрлігі 2018 жылы қауіпсіздік мәселелеріне сілтеме жасап, әлемдегі әскери базаларда қытайлық Huawei мен ZTE компанияларының смартфондарын сатуға және пайдалануға тыйым салған болатын.
Қытай да американдық Tesla көліктеріне ұқсас шектеулер енгізді. 2021 жылы көліктерге орнатылған камераларға қатысты қауіпсіздік алаңдаушылығына байланысты оларды кейбір мемлекеттік нысандарға кіргізбеді. Tesla елдің жетекші автомобиль саласы қауымдастығының қолдауына ие болғаннан кейін, Бейжің 2024 жылы бұл шектеуді алып тастады.
Каденадағы тыйымға әзірге жария түрде жауап бермеген BYD 2025 жылы Tesla-ны басып озып, әлемдегі ең көп батареялы электр көліктерін сататын компанияға айналды. Енді ол шетел нарықтарын, соның ішінде әлемдегі төртінші үлкен автомобиль нарығы саналатын Жапонияны игеруде. Шілдеде компания жергілікті брендтер басым нарықтан орын алу мақсатында шағын әрі үнемді Racco электр мини-көлігін шығарған болатын.
Reuters материалы негізінде.