Мәскеуде Украина президенті кеңсесінің бұрынғы кеңесшісі Алексей Арестовичке сырттай үкім шығарылды: ол терроризмге шақырғаны және Ресей Қарулы Күштері туралы жалған ақпарат таратқаны үшін кінәлі деп танылып, 11 жылға бас бостандығынан айырылды, деп хабарлайды infohub.kz сайты.
РИА Новостидің Екінші Батыс округтік әскери сотының залынан хабарлауынша, судья шешімді жариялады: «Қылмыстардың жиынтығы бойынша Арестович Алексей Николаевичке түпкілікті жаза ретінде 11 жыл бас бостандығынан айыру тағайындалсын». Алғашқы үш жылды түрмеде өткізеді, қалған мерзімін жалпы режимдегі колонияда өтейді. Сонымен қатар, сот оған төрт жыл бойы интернеттегі сайттар мен арналарды басқаруға тыйым салды.
Арестович Ресейде іздеу жарияланған. Тергеу анықтағандай, 2022 жылдың 17 наурызында ол әлеуметтік желілер мен бейнехостингтерде ресейлік әскерлерді жабдықтау жүргізілетін темір жолдарды жоюға шақырған бейнеүндеу жариялаған. Сол жылдың 8 сәуірінде ол Краматорскідегі теміржол вокзалын Ресей Қарулы Күштерінің әскери қызметкерлері атқылағаны туралы жалған мәліметтерді желіде жариялап, кемінде 33 адам қаза тауып, 100-ге жуық бейбіт тұрғын жараланғанын мәлімдеген.
Арестовичтің әрекеттері Ресей ҚК-нің 205.2-бабының 2-бөлігі (интернетті пайдалана отырып, террористік қызметке жария шақыру) және 207.3-бабының 2-бөлігінің «д» тармағы (ұлттық алауыздық себептері бойынша Ресей Қарулы Күштері туралы әдейі жалған ақпарат тарату) бойынша сараланған.
Еске салайық, Арестович Украина президенті кеңсесінің кеңесшісі қызметін атқарған және Днепрдегі зымыран оқиғасына байланысты жанжалдан кейін 2023 жылдың басында оны тастап кеткен. Ол әлеуметтік желіде өтініш фотосын жариялап, жіберген принциптік қателігіне байланысты отставкаға кеткенін хабарлаған. 2023 жылдың күзінде Украинада оған қатысты қылмыстық іс қозғалған, ал 2025 жылы президент Владимир Зеленский оған қарсы санкциялар енгізген.