Аризона косметикалық алып L’Oreal-ді тұтынушылардың құқығын бұзды деп ресми түрде айыптаған АҚШ-тағы алғашқы штат болды. Штат прокуратурасы компания шашты түзететін танымал құралдарының онкологиялық аурулармен байланысы туралы деректерді жасырды деп мәлімдеді, деп хабарлайды infohub.kz сайты.
Reuters дерегінше, талап арызда L’Oreal штаттың тұтынушылар құқығын қорғау туралы заңдарын бұзды деп айыпталып отыр — өнім аналық без және жатыр обыры қаупі туралы ескертусіз сатылған.
Штат билігі айыппұл салуды және залалды өтеуді, сондай-ақ компанияны өнім сатуды тоқтатуға міндеттейтін сот шешімін талап етіп отыр.
Айта кетейік, қазір L’Oreal Чикагодағы федералдық сотта біріктірілген 12 мыңнан астам осындай талап арызға тап болып отыр.
Алғашқы талап арыздар 2022 жылы Ұлттық денсаулық сақтау институттарының зерттеуі жарияланғаннан кейін түсе бастады. Онда Dark and Lovely, Optimum және басқа да сауда маркаларымен сатылатын (шашты мәңгілікке түзетуге уәде беретін) құралдарды қолданатын әйелдерде жатыр обырының даму ықтималдығы екі еседен астам жоғары болғаны айтылған.
Алайда L’Oreal USA өкілі компания өз өнімінің қауіпсіздігіне сенімді екенін және бұл тұжырымдардың заңдық немесе ғылыми негізі жоқ деп санайтынын мәлімдеді.
Бұған дейін «Курсив» әлемді онкология өрлеуі күтіп тұрғанын жазған. Дүниежүзілік денсаулық сақтау ұйымының жаһандық баяндамасына сәйкес, 2050 жылға қарай планетада обырмен ауыратындар саны жылына 35 млн адамға дейін өседі.