11 қазан күні таңертең қазақстандықтар inDrive такси сервисінде сапар бағасының күрт қымбаттағанына тап болды — «Яндекс» сервистерінің істен шығуына байланысты кейбір тапсырыстардың құны үш есеге өсті, деп хабарлайды infohub.kz сайты.
Threads желісіндегі қолданушылар «Яндекс Go» сервисі істемей қалғаннан кейін тарифтердің айтарлықтай өскенін жазды. Бір қолданушы бағаның «көкке самғағанын» атап өтті: бұрын сапар 900 теңге тұрса, енді такси шақыру тек 2,6 мың теңгеге мүмкін болды.
Басқа қолданушылар Алматыда такси сапарының құны 4 мың теңгеге жеткенін көрсетті. Кейбіреулер сапар мен сервис сапасына да наразы болды.
Жағдай соншалықты ауырласқандықтан, оған inDrive негізін қалаушы және CEO Арсен Томский пікір білдірді. Ол жолаушылардың күрт көбеюі сұраныс пен ұсыныс арасында теңгерімсіздік тудырғанын мойындады. Оның айтуынша, компания жүргізушілерді тарту үшін комиссияны міндетті салықтарды жабуға қажетті ең төменгі деңгейге дейін төмендетті.
«Бүгін, бәлкім, бағаның шамадан тыс өсуін тежеу үшін сауда диапазонын қосымша шектейміз», – деді Арсен Томский.
Бұған дейін Қазақстанда «Яндекс Go» сервистерінің – такси мен тағам және тауар жеткізудің жұмысында ақаулар байқалғаны хабарланған. Компания сервистерді қалпына келтіру жұмыстарын жүргізіп жатқанын мәлімдеді, бірақ нақты мерзімдер әзірге белгісіз.