Қазақстанның 200-ден астам болашақ әскери дәрігері отандық және шетелдік медициналық жоғары оқу орындарында білім алып жатыр. Бұл туралы Қорғаныс министрлігі хабарлады. 2027 жылы Қарулы күштердің әскери-медициналық бөлімшелері бакалавриат, интернатура және резидентураны бітіретін шамамен 40 түлекпен толығады, деп жазады infohub.kz сайты.
Болашақ мамандардың басым бөлігі Әуе қорғанысы күштерінің Әскери институтында оқиды. Мұнда 150-ден астам курсант-медик әскери дайындықтан өтіп жүр, олардың ішінде 80-нен астамы қыздар. Курсанттар медициналық пәндерді М. Оспанов атындағы Батыс Қазақстан медицина университетінде меңгереді. Олардың барлығы мемлекеттің толық қамтамасыз етуінде.
Тағы 50-ден астам болашақ әскери дәрігер Түркия, Армения, Қытай және Ресейдің медициналық жоғары оқу орындарында білім алып жатыр.
Қорғаныс министрлігінің сұранысы бойынша С. Ж. Асфендияров атындағы Қазақ ұлттық медицина университеті мен Астана медицина университетінің резидентурасында дәрігерлер даярлауға арналған мақсатты білім гранттары бөлінді. Мамандар хирургия, анестезиология және реаниматология, терапия, рентгенология және клиникалық зертханалық диагностика бағыттары бойынша даярланады.
«Жас мамандарды әскери-медициналық мекемелердің қажеттіліктерін қамтамасыз етуге тарту бағдарламасы екінші жыл қатарынан жүзеге асырылып келеді. Қазіргі таңда 16 адам оқып жатыр, олар болашақта біздің бөлімшелерде қызметін жалғастырады», — деді Қарулы күштердің Бас әскери-медициналық басқармасы бастығының емдеу-профилактикалық жұмыс жөніндегі орынбасары, медициналық қызмет полковнигі Берік Ілиясов.
Резидентурада оқу қорғаныс және денсаулық сақтау министрліктерінің ынтымақтастығы аясында қаржыландырылады. Мақсатты гранттар әскери-медициналық бөлімшелер мен мекемелерде сұранысқа ие мамандықтар бойынша дәрігерлер даярлауға мүмкіндік береді.
Қазақстандық және шетелдік медициналық жоғары оқу орындарымен ынтымақтастық Қарулы күштердің қажеттіліктерін ескере отырып жалғасады.
Бұған дейін «Курсив» Қазақстанда дәрігерлер даярлаудың мемлекеттік стандарты жаңартылғанын жазған болатын. Денсаулық сақтау министрлігінің бұйрығына сәйкес, оқу жоғары медициналық білім мен кемінде бес жылдық тәжірибесі бар тәлімгер-дәрігерлердің жетекшілігімен практикалық дайындықты қамтитын интернатураны қамтиды.