Қазақстанда Қауіпсіздік кеңесінің отырысында мақұлданған әскери реформа жоспары іске асырыла бастады. Өзгерістердің егжей-тегжейін Қорғаныс министрлігі жариялады, деп хабарлайды infohub.kz сайты.
Жоспарға сәйкес өзгерістер Қарулы күштердің құрылымына, әскери басқару жүйесіне, әскерлерді даярлауға, әскери қызметті өткеру тәртібіне және әскери қызметшілердің құқықтарын қорғауға қатысты болады. Ведомство түсіндіргендей, армияның негізгі құрамдас бөліктерін жетілдіру жоспарлануда: Қарулы күштердің құрылымы мен құрамы, қорғаныс жоспарлауы, мобилизациялық даярлық және резервті қалыптастыру жүйесі.
Технологиялық жаңғырту отандық қорғаныс өндірісін дамытумен қатар жүреді, оның ішінде ұшқышсыз құралдар мен оларға қарсы әрекет ету құралдары, жасанды интеллект пен цифрлық шешімдерді енгізу қарастырылған.
Әскерлерді даярлау сапасын арттырып, әскери жаттығуларға жұмсалатын шығынды қысқарту үшін ұрыс қимылдарын модельдеуге мүмкіндік беретін симуляциялық бағдарламаларды енгізу көзделген. Әскери қызметшілердің жаңа тактика мен заманауи қару-жарақ үлгілерін қолдануды ескере отырып, жеке де, бөлімше құрамында да сенімді әрекет ету дағдыларын қалыптастыруға ерекше көңіл бөлінеді.
Негізгі өзгерістердің бірі — мерзімді әскери қызметтің екі кезеңді моделіне көшу. Бір шақырылымдағы жаңа сарбаздар алғашқы алты ай бойы оқу орталықтарында болады, онда әскери қызметке бейімделіп, базалық әскери білім алып, дене дайындығын шыңдайды. Оқыту форматы сарбаздарға тілдерді үйренуге және жасанды интеллектті пайдалану дағдыларын дамытуға мүмкіндік береді, сонымен қатар әскери қызметшілер тек әскери мамандықтарды ғана емес, сұранысқа ие азаматтық жұмыс кәсіптерін де меңгере алады.
Келесі алты айда әскери қызметшілер әскери бөлімдерде қызмет өткеріп, әскери даярлықты жетілдіріп, бөлімше құрамында міндеттерді орындайды. Жаңа модельдің жекелеген элементтері «Sarbaz+» жобасы аясында сынақтан өткізілді. Екі кезеңді мерзімді әскери қызметтің пилоттық жобасын іске қосу 2027 жылға жоспарланған.
Сонымен қатар әскери қызметті өткеру жағдайын жақсартуға және әскери қызметшілерді әлеуметтік қорғауға ерекше көңіл бөлінеді. Әскери бөлімдердің қолбасшылығынан тәуелсіз әскери кеңесшілер институтын құру көзделген. «Олар әскери қызметшілерге қолдау көрсетіп, бұзушылықтарды анықтауға көмектесіп, олардың заңды мүдделерін қорғайды. Басым міндеттердің бірі — әскери қызметшілерді сапалы тамақпен және киім-кешекпен қамтамасыз ету. Сонымен қатар казарма қорын, оқу нысандарын, полигондарды жөндеу және қалпына келтіру жоспарлануда», — деп қосты министрлікте.
Өзгерістер жастарды даярлау жүйесіне де қатысты болады. 2027 жылдан бастап «Жас Қыран», «Жас Ұлан» және «Жас Сарбаз» кезеңдерін біріктіретін «Жас айбын» әскери-патриоттық даярлығының бірыңғай жүйесін құру көзделген. Мектептерде қауіпсіз мінез-құлық дағдыларын қалыптастырып, алғашқы көмек көрсетуге және төтенше жағдайларда әрекет етуге үйретеді.
Сонымен қатар әкімдіктермен бірлесіп жалпы білім беру мекемелерінде сапалы бастапқы әскери даярлықты қамтамасыз ету және мамандандырылған әскери мектептер желісін дамыту жалғасады.