АҚШ Жағалау күзеті Бермуд аралдарынан Бостонға ұшып бара жатқан, бортында алты адам болған медициналық жедел жәрдем ұшағын іздестіріп жатыр. Ұшақ сенбі күні таңертең АҚШ Федералдық авиация әкімшілігімен (FAA) байланысын үзген, деп хабарлайды infohub.kz сайты.
Осы әкімшілік өкілі Guardian басылымына берген мәлімдемесінде Gulfstream G-100 ұшағына қатысты іздеу-құтқару дабылы жергілікті уақытпен сенбі күні таңғы 1.20-да жарияланғанын айтқан.
Associated Press агенттігі Бермуд әуежайының операторы Skyport компаниясының мәлімдемесіне сілтеме жасап хабарлағандай, Канадада тіркелген медициналық жедел жәрдем ұшағы түнде Бермудтағы LF Wade халықаралық әуежайынан Массачусетске қарай ұшқан кезде бортында төрт экипаж мүшесі мен екі жолаушы болған.
NBC News телеарнасы ұшақ операторы — Latitude Air Ambulance компаниясының ұшу операциялары жөніндегі директоры Кларенс Тогеретцтің мәлімдемесіне сілтеме жасап, ұшақ Бермудта медициналық эвакуация жүргізіп жатқанын хабарлады.
«Экипажымыз уақытылы хабарласпаған кезде біз әрдайым қатты алаңдаймыз. Бірақ тағы да айтамын: оптимистік және оң көзқараспен қарасақ, бұл ең нашар жағдай болды дегенді білдірмейді», — деді ол NBC News-ке.
Сондай-ақ NBC Бостондағы Logan халықаралық әуежайын басқаратын Массачусетс порт билігінің ұшақ кестедегі уақытында келмегенін мәлімдегенін жазды. Порт билігінің өкілі: «Іздеу жалғасып жатқанда, ойымыз борттағылармен және олардың жақындарымен бірге», — деген.
FAA ұшақты табу үшін Құтқару үйлестіру орталығымен және АҚШ Жағалау күзетімен бірлесіп жұмыс істеп жатыр.
Жағалау күзеті X әлеуметтік желісіндегі парақшасында жариялаған мәлімдемесінде сенбі күні таңертеңгі жағдай бойынша іздеу аймағы Массачусетс штатындағы Нантакет аралының жағалауында екенін хабарлады.
Мәлімдемеде әуе және су үсті топтары ұшақты іздеуге кіріскені қосылған.
ABC News тергеуге қатысы бар дереккөзге сілтеме жасап, ұшақ бортында америкалықтар болмағанын хабарлады, алайда борттағылардың кім екені дереу жарияланбаған.
Басылымның дереккөзіне қарағанда, шенеуніктер ұшақ суға құламас бұрын 7 500 фут биіктікке дейін жылдам төмендеген деп есептейді.