Ақмола облысында кадрлық өзгеріс болды: облыс әкімінің өкімімен Асхат Ахмедьянов Аршалы ауданының әкімі болып тағайындалды, деп хабарлайды infohub.kz сайты.
Тағайындау туралы Ақмола облысы әкімдігінің ресми Telegram-арнасы хабарлады. Бұған дейін Асхат Ахмедьянов 2026 жылдың ақпанынан бастап жаңа тағайындауға дейін Ақмола облысы Кәсіпкерлік және өнеркәсіп басқармасының басшысы қызметін атқарған.
Асхат Ахмедьянов 1992 жылы 29 мамырда Солтүстік Қазақстан облысы Уәлиханов ауданының Комсомольское ауылында дүниеге келген. 2013 жылы «Тұран-Астана» университетін «мемлекеттік және жергілікті басқару» мамандығы бойынша бітірген.
Ауданның жаңа әкімінің еңбек жолы негізінен Атбасар ауданымен байланысты. 2014–2017 жылдары Атбасар ауданы Новоалександров ауылдық округі әкімі аппаратының бас маманы болып жұмыс істеген. 2017 жылы Атбасар ауданы Бастау ауылдық округі әкімі аппаратының бас маманы қызметін атқарған.
2017–2019 жылдары Ахмедьянов Атбасар ауданы Покров ауылдық округінің әкімі болды, 2019–2021 жылдары Атбасар ауданы кәсіпкерлік бөлімін басқарды. Кейін, 2021–2023 жылдары Атбасар ауданы Макеев ауылдық округінің әкімі қызметін атқарса, 2023–2026 жылдары Зеренді ауданы әкімінің орынбасары болды.
Еске салайық, 21 қыркүйекте Ақмола облысында Степногорск әкімі Ғайдар Кәсенов пен Аршалы ауданының әкімі Достанбек Есжанов қызметтерінен босатылған болатын. Сол күні Степногорск әкімі қызметіне Талғат Ерсеитов тағайындалды.