Астанадан пәтер іздеген қазақстандық 18 шаршы метр пәтерді айына 250 мың теңгеге жалдау ұсынысына ашуланды. Ал осындай сомаға нарықтан ауданы екі есе үлкен бір бөлмелі пәтер табуға болады, деп хабарлайды infohub.kz сайты.
Қыз баспананың қымбаттығына Threads әлеуметтік желісінде шағымданды. Пәтер іздегенде оған ауданы небәрі 18 шаршы метр, айына 250 мың теңге тұратын, әрі жөндеуі жоқ нұсқа кезіккен.
«Астана, сен не істеп жатырсың, не қылып жатырсың? Жалға берілетін пәтер бағасының өсуі — қарқынды. 18 шаршы метр — 250 мың теңге, жөндеуі де жоқ. Адалдық қайда? Қалыпты жалдайтын пәтерді қалай табуға болады?!» — деп жазды ол.
Алайда қазіргі хабарландыруларды тексеру 250 мың теңге осынша кішкентай аудан үшін ең төменгі баға емес екенін көрсетеді. Krisha.kz сайтында бұл ақшаға шамамен 36–40 шаршы метрлік бір бөлмелі пәтерлерді — Астананың сол жағалауынан да, оң жағалауынан да табуға болады.
Астанада жалдау бағасы қымбаттай береді. Тамызда Астанада тұрғын үй жалдаудың орташа құны 4,9%-ға өсіп, шаршы метрі 6 мың теңгеге жетті. Осы көрсеткішті шартты түрде 18 шаршы метрлік пәтерге қолдансақ, айына шамамен 108 мың теңге шығады — бұл жарияланған 250 мыңнан екі еседен астам аз.
Бір жылда астанадағы жалдау бағасы 17,5%-ға қымбаттады. Салыстырсақ, Алматыда бір айда баға 4,4%-ға өсіп, шаршы метрі 6,2 мың теңгеге жетті, ал бір жылда — 18,1%-ға.
Астанада тұрғын үйдің өзі де қымбаттап келеді. Тамызда жаңа үйлердегі шаршы метр 1,1%-ға қосылып, орта есеппен 747 мың теңгеге жетті. Қайталама нарықта баға 1,2%-ға өсіп, шаршы метрі 740 мың теңге болды.
Бұған дейін «Курсив» қазақстандықтар тұрғын үйден қалай үнемдей алатынын жазған. Мәселен, бірге жалдау шығынды екі есеге жуық қысқартуға мүмкіндік береді, ал үшеу болып тұрса, жеке бөлме айына шамамен 74 мың теңгеден бастап тұруы мүмкін.