Қазақстан астанасының халықаралық әуежайында аса қауіпті инфекцияларды анықтау кезіндегі іс-қимылдарға арналған практикалық оқу-жаттығу өтті. Қоғамдық денсаулық сақтау ұлттық орталығы (ҚДСҰО) елге қауіпті вирустардың әкеліну қаупіне жедел қызметтердің дайындығын тексерді, деп хабарлайды infohub.kz сайты.
Оқу-жаттығу легендасы бойынша, ұшақ бортында жұқпалы дертке шалдыққан жолаушы болған. Дәрігерлер науқасты жедел оқшаулап, байланыста болған адамдарды анықтап, әуе кемесін зарарсыздандыруға мәжбүр болды.
«Науқасты оқшаулау, ұшақты санитарлық тұраққа жіберу, байланыста болған адамдарды анықтап, оларды медициналық бақылауға алу, зарарсыздандыру, жедел хабарлау және қатысқан қызметтердің өзара іс-қимылы пысықталды», — делінген хабарламада.
Сонымен қатар ҚДСҰО жедел орталығының мамандары Конго Демократиялық Республикасындағы Эбола қызбасы бойынша ағымдағы эпидемиологиялық ахуалды және Бундибугио вирусының ерекшеліктері туралы мәліметтерді ұсынды.
Оқу-жаттығу үйлесімді өтіп, барлық қызметтердің аса қауіпті инфекциялардың әкеліну қаупіне дайындығын тексеруге мүмкіндік бергені атап өтілді.
ҚДР үкіметінің 12 қыркүйектегі деректеріне сәйкес, республикада жұқтырғандар саны 7022 адамға жетті. 3398 науқас қаза тапты, 1671 адам сауығып шықты.
Еске салайық, Дүниежүзілік денсаулық сақтау ұйымы бұған дейін Эболаның жаңа штаммының таралуын тоқтатуға білікті медиктердің, жедел серіктестердің және қаржыландырудың жетіспеушілігі кедергі келтіретінін ескерткен. Індет ошағының географиясы кеңейген сайын мәселелер ушыға түсуде.
Бұған дейін «Курсив» Эбола эпидемиясымен күресу үшін 5 мың медицина қызметкері жетіспейтінін жазған.
Сондай-ақ ағымдағы індет ошағы Эбола вирусының Бундибугио түрінен туындап, Конго тарихындағы ең ірі әрі ең өлімге әкелетін ошаққа айналғаны хабарланған.