Астана әкімі Жеңіс Қасымбек қала тұрғындары мен қонақтарын қалалық мүлікке ұқыпты қарауға шақырып, вандалдар туралы да пікір білдірді, деп хабарлайды infohub.kz сайты.
Қасымбек өз үндеуін Instagram-дағы ресми парақшасында жариялап, онда вандализм және «қоғамдық кеңістікке құрметсіздік» фактілерін атап өтті. Оның айтуынша, кейбір азаматтар аялдама павильондарын, қоқыс жәшіктерін, орындықтарды, мүсіндерді және өзге де қалалық мүлікті бұзады.
«Қоғамдық мүлікке деген көзқарас — жеке мәдениет пен тәрбиенің көрсеткіші. Қалада салынып, абаттандырылып жатқанның бәрі ең алдымен адамдардың қолайлылығы үшін жасалады. Қалалық инфрақұрылымды бүлдіріп, құқық бұзушылар тек қалаға ғана зиян келтіріп қоймай, барлық тұрғындар мен елорда қонақтарына, соның ішінде күнде осы көшелермен жүретін өз туыстары мен жақындарына да қолайсыздық туғызады», — делінген жазбада.
Әкімнің дерегінше, бөтен және коммуналдық мүлікті бүлдіргені немесе жойғаны үшін 143 адам жауапкершілікке тартылған, сондай-ақ ортақ пайдалану орындарын ластауға байланысты 928 әкімшілік құқық бұзушылық тіркелген.
«Қоғамға жат әрекеттер қылмыстық жауапкершілікке тартуға дейін қатаң жазаланатын болады. Сондай-ақ кәмелетке толмаған құқық бұзушылардың ата-аналары да жауапкершілікке тартылады. Барлық тұрғындар мен елорда қонақтарын біз өзіміз, туыстарымыз бен жақындарымыз тұратын қаламызға ұқыпты қарауға шақырамын», — деп қорытындылады Қасымбек.