Әлеуметтік желілерде тараған бейнежазбада үш жас әскери комиссариат қызметкерлері ретінде таныстырылып, жүргіншілерден жеке мәліметтерін сұрап, өздерімен бірге жүруге шақырған. Астана қорғаныс істері жөніндегі департаментінің тәрбие және идеологиялық жұмыстар жөніндегі бастығының орынбасары Мұрат Исенбаевтың мәлімдеуінше, бейнежазбадағы адамдар әскери комиссариат қызметкерлері емес, деп хабарлайды infohub.kz сайты.
Бейнеүндеу департаменттің Instagram парақшасында жарияланған. Мұрат Исенбаевтың айтуынша, бейнежазба департамент тарапынан зерделеніп, аталған факті бойынша Қазақстан Республикасы Ішкі істер министрлігінің аумақтық полиция органына бейнежазбадағы адамдардың жеке басын анықтау және оларды Қазақстан Республикасының заңнамасында көзделген жауапкершілікке тарту үшін хат жолданды.
«Аталған бейнежазбадағы адамдар әскери комиссариат қызметкерлері емес. Осы факті бойынша департамент ҚР ІІМ аумақтық полиция органына олардың жеке басын анықтау және ҚР заңнамасында көзделген жауапкершілікке тарту үшін хат жолдады. Қазіргі таңда Астана аумағында рейдтік іс-шаралар жүргізілмейді», — деді ведомство бастығының орынбасары.
Ол сондай-ақ әскери қызметке шақыру мен әскери бөлімдерді жасақтау 1414 нөмірінен SMS арқылы хабарлау, сондай-ақ тұрғылықты жері және жұмыс орны бойынша шақыру қағаздарын тапсыру арқылы жүзеге асырылатынын түсіндірді. Сонымен қатар Мұрат Исенбаев әскери қызметтен жалтарып жүрген азаматтарды анықтау полицияға жүктелгенін қосты.
Бұған дейін ер адам Астанада сағат 21:00 шамасында өзімен және жүкті әйелімен болған ерекше оқиға туралы хабарлаған. Көшеде олар әскери комиссариат қызметкерлері ретінде таныстырылып, өздерімен бірге жүруге шақырған белгісіз адамдарға тап болған. Әйел оларды телефонға түсіре бастағанда, олар қашып кеткен. Полиция ер адамдардың жеке басын анықтағанын мәлімдеді, алайда олардың әскери комиссариат қызметкерлері екенін нақтыламады.