Қазақстан астанасында қоғамдық көлікте қымбат тұратын техника жоғалған екі оқиға тіркелді. Алайда полиция қызметкерлерінің жедел әрекетінің арқасында екі құрылғы да иелеріне қайтарылды, деп хабарлайды infohub.kz сайты.
NUR.KZ агенттігінің Астана қалалық полиция департаментіне сілтеме жасап хабарлауынша, алғашқы өтініш автобуспен жүріп бара жатып iPhone смартфонынан айырылған қала тұрғынынан түскен.
«Алдын ала деректерге қарағанда, әйел құрылғыны автобус салонында абайламай түсіріп алған. Кейін оны сол жерде болған жас жігіт алып кеткен. Жедел іздестіру іс-шаралары барысында полиция қызметкерлері оның жеке басын анықтап, тауып алды. Нәтижесінде телефон табылып, иесіне аман-есен қайтарылды», — делінген ведомство хабарламасында.
Осыған ұқсас оқиға Астананың тағы бір тұрғынымен де болды. Ер адам маршруттық автобустың артқы орындығына көк сөмкедегі ноутбугін қалдырып кеткен. Шамамен он минуттан кейін көлік жүргізушісі қалдырылған техниканың орнында жоқ екенін байқаған.
Жедел іздестіру іс-шаралары барысында тәртіп сақшылары жоғалған ноутбуктің орналасқан жерін анықтап, тапты.
Полиция азаматтарға қоғамдық көлікте немесе басқа да жерлерде жеке заттарын жоғалтқан жағдайда құқық қорғау органдарына уақтылы жүгіну қажеттігін еске салды.
«Егер қоғамдық көлікте немесе басқа жерде жеке заттарыңызды жоғалтсаңыз, полицияға уақтылы жүгініп, барлық белгілі мән-жайларды хабарлау маңызды. Бұл мүлікті іздеу бойынша қажетті шараларды жедел қабылдауға көмектеседі», — деп атап өтті ведомствода.