Астанадағы №8 «Думан» мемлекеттік балабақшасына қатысты жанжал ресми түйін алды: Астана білім басқармасы тексеру қорытындысын жариялады. Тексеру «өлі жандар» мен қаражатты жымқыру деректерін растамады, бірақ қызметкерлердің дербес деректеріне бөгде адамның қол жеткізуіне дейінгі бірқатар басқа да заңбұзушылықтарды анықтады. Бұл туралы infohub.kz сайты хабарлайды.
Тексеруге мектепке дейінгі мекеме қызметкері Арай Құсайынованың әлеуметтік желілерде тараған бейнеөтініші себеп болды. Әйел балабақша құжаттарында «өлі жандар» мен қаражатты жымқырудың ықтимал деректерін тапқанын, ал білім басқармасына шағымданғаннан кейін оны кенеттен жұмыстан шығарып жібергенін мәлімдеді.
Ведомствоның дерегінше, мекеме педагогтері лауазымдық міндеттеріне кірмейтін жұмыстарға тартылған. Сонымен қатар тексеру балабақшадағы қауіпсіздік талаптарының бұзылғанын анықтады.
«Атап айтқанда, мекеме аумағына рұқсатсыз және бақылаусыз бөгде адам кірген. Анықталғандай, ол бұрын меңгерушімен некеде болған. Алайда ол балабақшада жұмыс істемеген және ұйым құжаттарына қол жеткізуге мүмкіндік беретін шарт жасамаған. Соған қарамастан ол қызметкерлердің дербес деректеріне қол жеткізген», — деді білім басқармасында.
Ведомствода бұзушылықтарды әдіскер мен күзет қызметкерінің түсініктемелері растағанын, сондай-ақ бейнебақылау камераларының жазбалары қаралғанын хабарлады.
«Тексеру қорытындысы бойынша қызметкерлердің дербес деректерін тиісті рұқсатсыз бөгде адамға беру, тарату және оған қол жеткізуін қамтамасыз ету фактілері анықталды», — делінген білім басқармасының хабарламасында.
Нәтижесінде меңгерушімен еңбек шарты бұзылды. Ведомство жұмыстан шығарудың үш себебін атады: Қазақстан Республикасы заңнамасының — «Педагог мәртебесі туралы» заңның, Еңбек кодексінің, «Дербес деректер және оларды қорғау туралы» заңның, сондай-ақ мектепке дейінгі ұйымдардың терроризмге қарсы қорғаныс ережелерінің талаптарын бұзу.
Сонымен қатар білім басқармасының тексеруі «өлі жандар» немесе қаражатты жымқыру туралы ақпаратты растамады.
Бұған дейін «Курсив» Астанадағы жекеменшік балабақша тәрбиешісін қызды ұрды деп айыптағаны туралы жазған болатын.