15 шілдеде Астанада Орталық Азия кәсіпорындарының ESG (экологиялық, әлеуметтік және корпоративтік жауапкершілік) озық тәжірибелер жинағының тұсаукесері және жасыл трансформация мен тұрақты дамуға арналған тақырыптық семинар өтті, деп хабарлайды infohub.kz.
Қытай мен Орталық Азия елдерінің мемлекеттік органдары, халықаралық ұйымдар, ірі компаниялар, сауда-өнеркәсіп бірлестіктері мен талдау орталықтарының өкілдері ESG саласында тәжірибе алмасып, Қытай мен Орталық Азия арасындағы тұрақты даму қағидаттарына негізделген жаңа ынтымақтастық экожүйесін қалыптастыруды талқылау үшін бас қосты.
Қытайдың Қазақстандағы елшілігінің кеңесші-өкілі Су Юйдың айтуынша, елде қытай капиталы қатысатын 10 мыңнан астам кәсіпорын тіркелген. Бұл компаниялар заң аясында жұмыс істейді, талаптарды сақтайды және әлеуметтік міндеттемелерді белсенді орындайды. Оның сөзінше, жинаққа енгізілген тәжірибелер ESG-тің Қытай мен Қазақстан арасындағы ынтымақтастықты тереңдететін ортақ даму тұжырымдамасына айналғанын көрсетеді.
ҚР Экология және табиғи ресурстар министрлігі жанындағы Халықаралық жасыл технологиялар және инвестициялық жобалар орталығы басқарма төрағасының орынбасары Ерлан Еркебланович жинақтың жариялануы табысты тәжірибені таратуға үлес қосып, мемлекеттік органдар, бизнес, академиялық қоғамдастық және халықаралық ұйымдар арасындағы ынтымақтастыққа ықпал ететінін айтты.
«Синьхуа» агенттігінің Қытай экономикалық ақпарат қызметінің вице-президенті Цзи Лэй биылғы жылдың наурыз айынан бастап Орталық Азияның бес елінен энергетика, ауыл шаруашылығы, инфрақұрылым, қаржы және басқа салаларды қамтитын 60-қа жуық өтінім түскенін хабарлады. Ұйымдастырушылар жинақ саясаткерлер, нақты сектор және ғылыми қоғамдастық арасында көпір болады деп үміттенеді.
«Хабар» агенттігі» АҚ басқарма төрағасы Кемелбек Бақтығұлұлы Қазақстан мен Қытайдың мәңгілік жан-жақты стратегиялық серіктес екенін атап өтті. Екі елдің жетекші БАҚ-тарының өзара іс-қимылы – осындай ынтымақтастықтың маңызды бөлігі. Тәжірибе алмасу, бірлескен жобалар және тұрақты даму бастамаларын объективті жариялау халықтар арасындағы өзара сенім мен түсіністікті нығайтады.
Тәжікстанның инвестициялар және мемлекеттік мүлікті басқару жөніндегі мемлекеттік комитетінің жобаны іске асыру тобының жетекшісі Зафар Хакимұлы Махмудов сараптамалық комиссия атынан істерді іріктеу тәртібі туралы айтып, жинақтың жарияланғанын ресми түрде хабарлады.
Жинаққа Орталық Азия кәсіпорындарының тұрақты даму қағидаттарын іске асырудың өзге елдер мен салаларда қайталануға жарамды 13 нақты мысалы енгізілген. Олардың ішінде – Амударияның оң жағалауындағы газ кен орындарын игеру жобасы түрікмен ауылдарының тұрғындары үшін «бақыт аймағын» құрған; Арал теңізі маңындағы шөлейт жерлерде мақта алқаптарын өсірген қытайлық ғалым-аграрийлердің қызметі; Самарқанда заманауи саябақ түріндегі қоқыс өртейтін зауыттың салынуы.
Сондай-ақ жинақта климаттық және экологиялық тәуекелдерді ескеретін жасыл қаржыландыру саласындағы кешенді шешімдер; Тұған-Қарағандағы қоғамдық қатысу және әлеуметтік әсерді бағалау жүйесі; жүздеген мың қазақстандық студентке жасанды интеллектті үйренуге мүмкіндік берген білім беру онлайн-платформасы бар.
Орталық Азияда жасыл даму және әлеуметтік жауапкершілік саласында ауқымды өзгерістер жүріп жатыр. Өңірдің дамуына тартылған компаниялардың саны артып, олар бір мезгілде қоршаған ортаны қорғау жобалары мен іс-шараларын жүзеге асырып, білім беру, денсаулық сақтау және өмір сапасын жақсартуға қатысуда.
Қытайдың таза технологиялары мен цифрлық басқару тәжірибесі Орталық Азияның жасыл трансформациясына айтарлықтай қолдау көрсетуде. Жұмысшылардың әл-ауқатын арттыруға және қоғамның қатысуын кеңейтуге бағытталған жаңа институционалдық тетіктер пайда болуда.
Қырғыз Республикасының Сауда-өнеркәсіп палатасы вице-президенті Мэрим Кожокматова: «Бүгін ұсынылған жинақтың бірегей құндылығы – онда Орталық Азиядағы ESG тәжірибелерінің нақты және табысты мысалдары жинақталған. Бұл теориялық ойлар емес, трансшекаралық ынтымақтастық пен ұзақ мерзімді өңірлік өзара іс-қимылдың жаңа бастамаларына негіз бола алатын практикалық тәжірибе», – деп атап өтті.
«Бір белдеу – бір жол» халықаралық жасыл даму коалициясының бас хатшысының орынбасары әрі даму жөніндегі директоры Чжан Цзяньюй және «Астана» халықаралық қаржы орталығының Көміртегі платформасының жетекшісі Әсел Нұрахметова «ESG бренд құнын арттырудан тұрақты және пайдалы бизнес-модельге қалай өте алады» тақырыбында сарапшылық пікірлерін білдірді.
Іс-шараны «Синьхуа» агенттігінің Қытай экономикалық ақпарат қызметі және «Бір белдеу – бір жол» халықаралық жасыл даму коалициясы бірлесіп ұйымдастырды. Ұйымдастыру қолдауын KPMG Kazakhstan жәрдемдесуімен Қазақстандағы Қытай кәсіпкерлерінің бас ассоциациясы көрсетті.
Сондай-ақ іс-шараға Өзбекстанның Қазақстандағы елшілігінің кеңесшісі Азиз Абдуллаұлы Насиров, «Атамекен» ҰКП жанындағы Тұрақты даму және ESG жөніндегі кеңес төрайымы Юлия Якупбаева, Орталық Азия мен Ресейдегі CNPC өкілдері және өңірде белсенді жұмыс істейтін ондаған басқа кәсіпорындар қатысты.