Қазақстан астанасында әкімшілік ғимараттардың бірінде әдепсіз оқиға ұйымдастырған 68 жастағы ер адамға қатысты үкім шығарылды, деп хабарлайды infohub.kz сайты.
Астана соттарының мәліметінше, 24 тамызда мамандандырылған ауданаралық әкімшілік құқық бұзушылықтар соты азамат Ж.-ға қатысты істі қарады. Ол ұсақ бұзақылық жасады деп айыпталды. Іс материалдары бойынша, таңғы сағат 09:28 шамасында Ж. Мәңгілік Ел даңғылындағы Азаматтарды қабылдау орталығында металл іздегіштен өту кезінде шалбарын шешіп, қоғамдық тәртіп пен азаматтардың тыныштығын бұзған.
Сот отырысында Ж. өз кінәсін мойындамай, бұл әрекетін әзіл ретінде жасағанын айтты. Алайда оның кінәсі іс материалдарымен және оқиғаның бейнежазбасымен расталды.
ӘҚБтК-нің 434-бабының 1-бөлігінің санкциясы 20 АЕК мөлшерінде айыппұл салуды, не 20 сағаттан 60 сағатқа дейінгі мерзімге қоғамдық жұмыстарға тартуды, не 5 тәуліктен 10 тәулікке дейінгі мерзімге әкімшілік қамауға алуды көздейді. Жаза тағайындау кезінде сот жасалған әрекеттің дәрежесі мен сипатын, яғни лайықсыз мінез-құлық пен қоғамға ашық құрметсіздік танытуды ескерді. Сонымен қатар, сот ӘҚБтК-нің 50-бабына сәйкес әкімшілік қамау 63 жастан асқан адамдарға қолданылмайтынын назарға алды.
Сот қаулысымен Ж. ӘҚБтК-нің 434-бабының 1-бөлігінде кінәлі деп танылып, 86 500 теңге (20 АЕК) мөлшерінде айыппұл түріндегі әкімшілік жазаға тартылды. Қаулы заңды күшіне енген жоқ.