Қазақстандық оқушылардың күзгі демалысы жақындаған сайын полиция қызметкерлері ата-аналарға балаларды бақылауды күшейту қажеттігі туралы ескерту жасады, деп хабарлайды infohub.kz сайты.
Астана полиция департаментінің мәліметінше, демалыс — ата-аналар мен заңды өкілдерден балаларға ерекше көңіл бөлуді талап ететін кезең. Себебі оқушылардың бос уақыты артады.
«Кәмелетке толмағандар арасындағы құқық бұзушылықтың алдын алу, олардың қауіпсіздігін қамтамасыз ету және оқыс оқиғаларға жол бермеу мақсатында Астана полициясы ата-аналарды балалардың бос уақытын ұйымдастыруға, олардың қайда жүргенін және кіммен араласатынын бақылауға ерекше назар аударуға шақырады. Кәмелетке толмағандардың түнгі уақытта тұрғын үйден тыс жерде және ойын-сауық орындарында болуына заңнамада белгіленген шектеулердің сақталуына айрықша көңіл бөлу қажет», — деді полицияда.
Сонымен қатар ата-аналарға балалармен қоғамдық тәртіпті, жол жүру ережелерін және заңнама талаптарын сақтау қажеттігі туралы профилактикалық әңгімелерді жүйелі түрде жүргізу ұсынылады.
Астана полиция департаменті кәмелетке толмағандарға жанжалдарға, құқыққа қарсы әрекеттерге және олардың өмірі мен денсаулығына қауіп төндіруі мүмкін өзге де жағдайларға қатысуға жол берілмейтінін түсіндірудің маңызды екенін қосты.