Астанада танысын құрылыс материалдарын сатып алу кезінде алдап, ірі көлемдегі ақшаны иемденген күдікті ұсталды, деп хабарлайды infohub.kz сайты.
Ішкі істер министрлігінің ведомстволық сайтының мәліметінше, полицейлер күдіктінің тұлғасын анықтады. Ол азаматтың сеніміне кіріп, құрылыс материалдарын жеткізу сылтауымен ірі көлемдегі ақша қаражатын иемденген.
Тергеу барысында елорданың 44 жастағы тұрғыны зардап шеккенге құрылысқа қажетті кірпішті қолжетімді бағамен және қысқа мерзімде жеткізіп беретінін уәде еткені анықталды. Ол өз ниетінің шынайылығына сендіріп, 1 миллион 300 мың теңге көлемінде алдын ала төлем жасауды сұраған. Зардап шеккен ақшаны оның жеке шотына аударған.
Тергеу деректері бойынша, ақшаны алғаннан кейін күдікті уәде еткен құрылыс материалдарын жеткізбеген. Біраз уақыт ол әртүрлі сылтаулармен тапсырысты орындауды кейінге шегеріп, кейін зардап шеккенмен байланысқа мүлдем шықпай қойған. Осылайша, ол сенімді теріс пайдаланып, ақшаны алаяқтық жолмен иемденген.
Зардап шеккен полицияға жүгінгеннен кейін жедел-іздестіру іс-шаралары нәтижесінде күдіктінің тұлғасы анықталды. Ол кінәсін мойындады. Осы факті бойынша сотқа дейінгі тергеу жүргізілуде.
Полиция қазақстандықтарға ескертеді: құрылыс материалдарын немесе басқа да қымбат тауарларды сатып алу кезінде сатушының жеке басын, оның қызметінің заңдылығын және іскерлік беделін мұқият тексеру қажет.