Астанада мерекелік фейерверк ұнататындар қуаныштың орнына әкімшілік жазаға тартылды. Екі ер адам түнгі уақытта пиротехниканы қолданғаны үшін бес тәулікке қамалды, деп хабарлайды infohub.kz.
Алғашқы оқиға елордадағы қонақүйлердің бірінің жанында болды. 50 жастағы ер адам болашақ келінінің туған күніне орай әдемі салют ұйымдастыруды ұйғарды. Алайда мерекелік шара маңайдағы тұрғын үй кешендерінің тұрғындарының тыныштығын бұзды. Астана полиция департаментінің қызметкерлері құқық бұзушыға қатысты ұсақ бұзақылық бойынша әкімшілік хаттама толтырды. Сот шешімімен оған бес тәулікке қамау жазасы тағайындалды.
Екінші жағдай қаланың тұрғын аудандарының бірінде болды. 26 жастағы жігіт қыз ұзату рәсімінен кейін көпқабатты тұрғын үйдің жанында салют атып, жас отбасын құттықтауды жөн көрді. Мерекелік себепке қарамастан, оның әрекеті де қоғамдық тәртіпті бұзу деп танылды. Сот оған да осындай жаза – бес тәулік әкімшілік қамау тағайындады.
Елорда полициясы тұрғын үйлердің жанында, әсіресе түнгі уақытта пиротехникалық бұйымдарды қолдану азаматтардың тыныштығын бұзатынын және қауіпсіздікке қауіп төндіруі мүмкін екенін ескертеді. Құқық қорғау органдары қала тұрғындары мен қонақтарын айналасындағылардың демалу құқығын құрметтеуге және заң талаптарын қатаң сақтауға шақырады.