Астанада кәмелетке толмаған жасөспірім Бөгенбай батыр даңғылындағы аялдама павильонының шынысын сындырды. Оқиға бейнежазбаға түсіп, бұзақының жеке басын полиция қызметкерлері анықтады, деп хабарлайды infohub.kz сайты.
NUR.KZ агенттігі Polisia.kz-ке сілтеме жасап хабарлауынша, жасөспірім аялдама шынысын аяғымен теуіп, содан кейін оқиға орнынан қашып кеткен. Бүлінген павильон желіде тараған бейнежазбада түсірілген.
«ҚР ІІМ жаңалықтары» Telegram-арнасында нақтыланғандай, полиция қызметкерлері бұзақыны анықтады. Ұсақ бұзақылық үшін ол әкімшілік жауапкершілікке тартылды.
«Кәмелетке толмаған жасөспірім профилактикалық есепке қойылды. Оның мінез-құлқы мен жасаған құқық бұзушылығы кәмелетке толмағандар істері жөніндегі комиссияда жеке қаралып, тиісті профилактикалық ықпал ету шаралары қолданылады. Жасөспірімнің ата-анасы да оны тәрбиелеу жөніндегі міндеттерін тиісінше орындамағаны үшін әкімшілік жауапкершілікке тартылды», — делінген хабарламада.
Полицияда қала мүлкіне келтірілген залал кәмелетке толмағанның заңды өкілдерінен толық көлемде өндірілетінін атап өтті.
«Полиция вандализм және қала мүлкін бүлдіру фактілеріне қатаң ден қоюды жалғастыруда. Әрбір осындай фактіге құқықтық баға беріліп, кінәлілер жауапкершілікке тартылады», — деп қосты ведомство.
Бұған дейін Астанадағы Журналистер аллеясында екі жас жігіт мүсінді және жеті қоқыс жәшігін бүлдіргені хабарланған болатын.