Атырауда қала тұрғындары ащы иіс пен тұманның салдарынан терезе аша алмай отыр. Бұл жағдай алаңдаушылық тудырып, аймақ билігі шағымдарға жауап берді, деп хабарлайды infohub.kz.
Атыраулық _aidarownaa есімді тұрғын әлеуметтік желідегі Threads парақшасында болған оқиға туралы жазды. Оның айтуынша, таңғы сағат 5-те ол қатты иістен оянып, терезені ашқанда тұманды көріп қорқып кеткен. "Терезелер жабық, бірақ үйде иіс сезіледі, көшеде не болып жатқанын елестете алмаймын. Бізді ұйықтап жатқанда улап жатыр ма?!" — деп жазды ол.
Атырау облысы әкімдігінің ресми Telegram-арнасы қала тұрғындарының шағымдарына жауап ретінде Атырау мұнай өңдеу зауытында (АМӨЗ) тексеру жүргізіліп жатқанын хабарлады. "6 қыркүйекке қараған түні атмосфералық ауадағы ластаушы заттардың жоғары көрсеткіштері тіркелгеннен кейін Атырау облысының әкімі Болат Ақшолақов тиісті қызметтерге экологиялық жағдайдың нашарлауына әрекет етудің бекітілген алгоритміне сәйкес тексеру жүргізуді тапсырды. Санитарлық-эпидемиологиялық бақылау департаментінің мамандары қосымша өлшеулер жүргізіп, ықтимал шығарынды көздерін тексерді", — делінген хабарламада.
Тексеру аясында облыс әкімі "Тұзды балка" булану алаңдары мен АМӨЗ-дің булау станциясына барып, объектілердің ағымдағы жай-күйімен оқиға орнында танысты. Сонымен қатар, мемлекеттік органдар мен АМӨЗ өкілдерінің қатысуымен жедел кеңес өткізіліп, онда мониторинг деректері, ағымдағы жағдай және ауа сапасының нашарлау себептерін анықтау бойынша шаралар қарастырылды.
Өңір басшысы ауа сапасының аймақтық мониторинг жүйесін құру бойынша ұсыныстар әзірлеуді, қажетті қаржыландыруды, техникалық параметрлер мен іске асыру мерзімдерін көрсетуді, сондай-ақ барлық ықтимал ластану көздерін жан-жақты және объективті тексеруді қамтамасыз етуді тапсырды. Тексеру қорытындысы бойынша қосымша ақпарат берілетін болады, — деп түйіндеді әкімдік.