«№405 авиажөндеу зауыты» АҚ басқарма мүшесі Константин Ушаков алты жыл ішінде жалпы сомасы 425,3 млн теңге көлемінде сыйақы алды. Тек 2025 жылдың қорытындысы бойынша оның төлемдері 114,2 млн теңгені құрады, бұл бір жыл бұрынғыдан 56,8%-ға артық, деп хабарлайды infohub.kz сайты.
Компания деректеріне сәйкес, кемінде 2020 жылдан бері басқарма құрамындағы Ушаковтың сыйақысы жыл сайын дерлік өсіп отырған. 2020 жылы ол 43,3 млн теңге алса, 2025 жылы бұл сома 114,2 млн теңгеге дейін өскен. Бес жыл ішінде төлемдер 2,6 есеге, яғни 70,9 млн теңгеге артқан.
Жылдар бойынша сыйақы мөлшері: 2020 жыл – 43,3 млн теңге; 2021 жыл – 43,6 млн теңге; 2022 жыл – 49 млн теңге; 2023 жыл – 102,4 млн теңге; 2024 жыл – 72,8 млн теңге; 2025 жыл – 114,2 млн теңге.
Adata мәліметінше, «№405 авиажөндеу зауыты» АҚ-ның 53 акционері бар. Кәсіпорынның негізгі қызмет түрі – әуе және ғарыштық ұшу аппараттарын жөндеу және техникалық қызмет көрсету (ОКЭД 33160).
Қаржылық есептілікке сәйкес, компанияның 2024 жылғы таза пайдасы бір жыл бұрынғы 2,5 млрд теңгеге қарсы 2,8 млрд теңгені құрады.
Есептілікте кәсіпорынның түпкілікті бенефициарлары да көрсетілген: М. Ибрагимова, П. Шодиев және Э. Сурлевич. Бұл, ең алдымен, Eurasian Resources Group негізін қалаушылардың бірі Әлижан Ибрагимовтың жесірі Мұқадасхан Ибрагимова, ERG-тің тағы бір негізін қалаушысы Патох Шодиев, сондай-ақ қайтыс болған Александр Машкевичтің жиені Эдуард Сурлевич туралы болуы мүмкін.
Бұған дейін «Курсив» ERG акцияларының 40%-ы ресми түрде «Самұрық-Қазынаға» өткенін жазған болатын.