Әйелдер теннис қауымдастығы (ӘТҚ) әйелдер жарысына қатысушы теннисшілердің бір реттік генетикалық тесттен өтуін міндеттеді, деп хабарлайды infohub.kz сайты.
ӘТҚ-ның жексенбі күні жариялаған жаңа ережесіне сәйкес, жынысты анықтайтын генге тестілеу жақ ішінен жағынды немесе қан анализі арқылы жүргізіледі. Бұл ереже сейсенбіден бастап күшіне енеді. Бұған дейін қолданылған қағидат бойынша, трансгендер әйелдер егер олар өздерін әйел ретінде таныстырып, екі жыл бойы тестостерон деңгейін төмендетіп ұстаса, жарысқа қатыса алатын.
Қазір кәсіби теннисте ешбір деңгейде белсенді трансгендер әйелдер жоқ.
«SRY геніне бір реттік тестілеу ӘТҚ турнирлеріне қатысу құқығын растайды», — деді ӘТҚ өкілі Reuters агенттігіне. «Ойыншыларды тестілеу 2026 жылы басталады, бұл ретте құпиялылық пен деректер қауіпсіздігінің барлық шаралары сақталады. ӘТҚ бұл сезімтал әрі күрделі мәселе екенін түсінеді және барлық ойыншыларға әділ қарап, саясатты құрметпен әрі ойластыра жүзеге асыруға міндеттенеді».
Трансгендер ойыншы Рини Ричардс 1977–1981 жылдар аралығында әйелдер кәсіби турнеде өнер көрсеткен. Кейін ол теннис аңызы, гомосексуалдар құқығын қорғаушы Мартина Навратилованың жаттықтырушысы болды. 18 рет «Үлкен дулыға» турнирінің жеңімпазы атанған Навратилова спорттағы трансгендерлердің қатысуын сынап келеді. Ал әлемнің бірінші ракеткасы Арина Сабаленка әйелдердің трансгендерлермен кездесуін әділетсіз деп санайды.
12 рет «Үлкен дулыға» жеңімпазы, 1973 жылы атақты «жыныстар айқасында» жеңіске жеткен Билли Джин Кинг трансгендерлерді шеттету кемсітушілік деп есептейді.
Соңғы жылдары Әлемдік жеңіл атлетика және Әлемдік бокс сияқты бірқатар спорт федерациялары осындай генетикалық тестілерді енгізген.
Наурыз айында Халықаралық олимпиада комитеті әйелдер санатындағы жарыстарға тек бір реттік тестілеуден өткен биологиялық әйел спортшылар ғана қатыса алатынын мәлімдеді.
Трансгендерлерді қорғау топтары трансгендер спортшыларды шеттету кемсітушілік деп санайды. Ал трансгендерлердің қатысуына қарсылар еркектердің жыныстық жетілуі спортшыларға бұлшықет және қаңқа артықшылығын беретінін, ауысу кезінде бұл артықшылықтың жойылмайтынын айтады.