Жапонияда өтіп жатқан Азия ойындарында Қазақстан құрамасы екінші күн қатарынан командалық қоржынын тек бес қола медальмен толықтырды. Ал бәсекелестер қарқынын бәсеңдетпей отыр: бейресми медаль есебінде қазақстандық спортшыларды Өзбекстан басып озды, деп хабарлайды infohub.kz сайты.
Сенбіде үш рет қола жүлдеге ескекшілер көтерілді — барлығы 500 метр қашықтықта. Қола жүлдегер атанғандар: байдаркашылар Стэлла Суханова мен Дмитрий Холмогоров, сондай-ақ каноэ-қоспақта өнер көрсеткен Сергей Емельянов пен Руфина Искакова. Ал байдарка-қоспақ экипажы Ольга Шмелева мен Артем Терещенко жүлдеден бір қадам қалды.
Арина Малиновская, София Шульженко және Елизавета Безруковадан құралған әйелдер командасы 50 метрден үш қалыпта кіші калибрлі винтовкадан атудан қола медаль жеңіп алды.
Семсершілер Артем Саркисян, Нұрмұхаммед Жайлыбай, Назарбай Саттархан және Қуаныш Ерғашбай саблистердің командалық турнирінде үшінші орын алды. Саркисян үшін бұл ағымдағы жарыстың екінші қоласы.
Жеңіл атлеттер қуантпады. Натурализацияланған кениялық Шадрак Коеч марафонда 7-орынға тұрақтады. Мария Шувалова да 400 метрге жүгіруде жетінші болып мәреге жетті. Иван Иванов ядро лақтыруда тоғызыншы, ал Айана Болатбекқызы 1500 метр қашықтықта оныншы орын алды.
Штангашы Бексұлтан Айтбай 75 келіге дейінгі салмақ дәрежесінде жетінші орынға тұрақтады.
Боксшылар Махмұд Сабырхан мен Нұрбек Оралбай ширек финалға шықты. Виктория Графеева төрешілердің көмегімен болса да, гендерлік тиесілігі даулы олимпиада чемпионы Линь Юйтинге жол берді.
Әйелдер гандбол құрамасы Азиададағы өнерін аяқтай отырып, Өзбекстанды жеңді. Ал су полошылары, керісінше, Жапонияда жаңа ғана бастады — А тобындағы алғашқы матчта алаң иелеріне есе жіберді.
Азиаданың жетінші күнінен кейін бейресми медаль есебінің көшбасшылары (Қытай, Жапония, Оңтүстік Корея) өзгерген жоқ. Алтын медаль саны бойынша Қазақстанды Өзбекстан мен Таиланд қуып жетті. Ал көршілеріміз күміс қоры бойынша біздің атлеттерді басып озды. Қазақстандықтардан небәрі бір алтынға Иран мен Бахрейн қалып қойып отыр. «Қола ғасырын» аяқтау уақыты келді.
Жапониядағы XX Жазғы Азия ойындары 19 қыркүйекте ресми түрде ашылды. 45 елдің атлеттері қатысатын кешенді жарыста 460 медаль жиынтығы сарапқа салынады: 217-сі — ерлер арасында, 204-і — әйелдер арасында және 39-ы — аралас разрядтарда. Азиада-2026-да Қазақстан құрамасының құрамында 35 спорт түрінен 558 спортшы өнер көрсетеді.