Елордада Біріккен Араб Әмірліктерінің инвесторларының қатысуымен салынған SABIS International School халықаралық мектебі жұмысын бастады. Жоба құны 30 миллион АҚШ долларын құрады, деп хабарлайды infohub.kz сайты.
SABIS International School – Astana оқу орны Қазақстан президентінің БАӘ-ге сапары қорытындысы бойынша берген тапсырмасына сәйкес салынды. Жобаны эмираттық Emirates Global Education Investment Group, Mazrui International және SABIS Holding компаниялары білім басқармасы мен KAZAKH INVEST ұлттық компаниясының қолдауымен жүзеге асырды.
Құрылысқа 30 миллион доллар салынды, ал жалпы инвестиция көлемі 45 миллионға жетуі тиіс. Мектеп 9 гектар аумақта орналасып, 3400 оқушыға есептелген.
Оқу корпусынан бөлек, кешен құрамына театр, жартылай олимпиадалық бассейн, спорт нысандары және жеке балабақша ғимараты кіреді. Құрылыс жұмыстары 2024 жылдың наурыз айында басталды.
Бұл – елдегі SABIS білім беру жүйесі бойынша жұмыс істейтін алғашқы оқу орны. Бағдарлама ұлттық стандарттарға бейімделген және оқушыларды халықаралық емтихандарға және әлемнің жетекші университеттеріне түсуге дайындайды. Оқыту үш тілде жүргізіледі: негізгі оқыту тілі – ағылшын тілі, сонымен қатар қазақ және орыс тілдері оқытылады.
«Біздің мақсатымыз – Астанадағы отбасыларға Қазақстаннан шықпай-ақ сапалы халықаралық білім алу мүмкіндігін беру, SABIS-тің 140 жылға жуық тәжірибесін ұлттық білім талаптарымен және Қазақстанның мәдени құндылықтарымен ұштастыру. Халықаралық деңгейдегі білім тек шетелде немесе шектеулі отбасылар тобына ғана қолжетімді мүмкіндік ретінде қабылданбауы керек деп есептейміз», – деді SABIS президенті және бас директоры Виктор Саад.
SABIS – 1886 жылы негізі қаланған халықаралық білім беру желісі, бүгінде бес құрлықтағы 21 елде ұсынылған.
Мектепте оқу ақысы сыныпқа байланысты 6,5 мыңнан 8,6 мың долларға дейін өзгереді.
Бұған дейін Астана халықаралық қаржы орталығының соты Haileybury Almaty беделді мектебінің талабы бойынша шешім шығарғаны хабарланған болатын. Оқу орны ата-аналардан төленбеген білім қызметтері үшін 8,1 миллион теңгені сәтті өндіріп алды.