Тайланд астанасын қатты муссондық жаңбырлар қамтыды: Бангкок билігі қаланың барлық 50 ауданында табиғи апат режимін енгізді. Себебі — нөсер жаңбыр мен кенеттен болатын су тасқыны қаупі, деп хабарлайды infohub.kz сайты.
Жарияланым дерегінше, тәулік ішінде кейбір аудандарда 210 мм-ге дейін жауын-шашын түсті. Су ондаған көшеге шығып, көлік қозғалысы іс жүзінде тоқтап қалды, ал кейбір тұрғындар қайықпен жүруді таңдап отыр. Әсіресе астананың шығысында жағдай қиын — онда каналдар толып, су көшелерден тартылмай тұр.
Жергілікті билік тұрғындардан заттары мен техникасын биік жерге көтеріп, мүмкіндігінше үйден шықпауды сұрады.
Басылым атап өткендей, дауылды ескерту 27 қыркүйекке дейін күшінде, бірақ ауа райының жақсаруы мен судың тартылуы 28–29 қыркүйекке қарай күтіледі.
Туристерге жолға, әсіресе әуежайларға, вокзалдарға немесе астананың негізгі көлік тораптарына барар жолда көбірек уақыт қалдыруға кеңес беріледі. Жолға шығар алдында жол жағдайын тексеріп, төтенше қызметтердің, туризм басқармасының және туристік полицияның жедел желілерін пайдалану ұсынылады.
Айта кетейік, Бангкок аймағында маусымнан қарашаға дейін жаңбырлы маусым жалғасады. Ең ылғалды ауа райы, көп тропикалық нөсер мен найзағай қыркүйек пен қазанда байқалады.